– ગ્રોક અને એક્સની અમુક પૉલિસી ભારતના કાયદાની વિરૂદ્ધ : કેન્દ્ર
– યોગ્ય પગલાં ભરીને 72 કલાકમાં રિપોર્ટ નહીં આપો તો આકરી કાર્યવાહી કરીશું : એક્સ પ્લેટફોર્મને સરકારની તાકીદ
નવી દિલ્હી : કેન્દ્ર સરકારના ઈલેક્ટ્રોનિક્સ અને આઈટી મંત્રાલયે ઈલોન મસ્કની માલિકીના એક્સ પ્લેટફોર્મ અને ગ્રોકને આકરી નોટિસ ફટકારી છે. કેન્દ્રની નોટિસમાં આ પ્લેટફોર્મને આદેશ આપવામાં આવ્યો છે કે તાકીદની અસરથી અશ્લિલ અને ગેરકાયદે સામગ્રી હટાવો, નહીંતર કાર્યવાહી માટે તૈયાર રહો. એક્સ પ્લેટફોર્મે આ નોટિસનો હજુ સુધી કોઈ સત્તાવાર જવાબ આપ્યો નથી. કેન્દ્ર સરકારે કહ્યું હતું કે ગ્રોકનો દુરુપયોગ કરીને ઘણાં યુઝર્સ અશ્લિલ સામગ્રી ક્રિએટ કરે છે અને કંપની એના પર અંકુશ લગાવતી નથી.
