Surat Corporation : સુરત પાલિકાના 213 કરોડના કચરાના સાયન્ટીફીક નિકાલ માટેનો આપેલો કોન્ટ્રાક્ટમાં થયેલા કૌભાંડના કારણે સ્વચ્છતા સર્વેક્ષણ લીગમાં સુરતનું સ્થાન જોખમમાં મુકાયું છે. તેમ છતાં નવા ઈજારદાર નહી મળતા પાલિકાએ,કચરો કૌભાંડમાં પાલિકાની આબરૂનો કચરો કરનારા સીડી ટ્રાન્સપોર્ટને વધુ 10 માસનો કોન્ટ્રાક્ટ આજે લંબાવવાનો નિર્ણય કર્યો છે. પાલિકાએ ઈજારદારને બ્લેક લિસ્ટ કરવા સાથે નવી એજન્સી માટે કવાયત કરી હતી પરંતુ કોઈ એજન્સી ન મળતાં હાલ કૌભાંડી એજન્સી પાસેથી જ કચરો ઉલેચવાની ફરજ પડી છે.
સુરત પાલિકાના કચરાના નિકાલ માટે 213 કરોડનો કોન્ટ્રાક્ટ વાપીની સી.ડી ટ્રાન્સપોર્ટને આપ્યો હતો. આ કોન્ટ્રાક્ટ પાછળ ભાજપના નેતાઓના આર્શીવાદ હતા તેથી કોન્ટ્રાકટર પાલિકાના અધિકારીઓને ગણકારતો ન હતો. પાલિકાના ખજોદ ખાતે સાયન્ટીફીક નિકાલ કરવાના બદલે કાંકરિયા ગામની જેમ અનેક ગામોમાં નિકાલ કર્યો હતો. આ મુદ્દે પોલીસ ફરિયાદ થયા બાદ પાલિકાની ભૂમિકા બહાર આવી હતી. આવી એજન્સીને બ્લેક લિસ્ટ કરવા માટે કામગીરી કરી હતી અને અઢી કરોડનો દંડ પણ ફટકારવામાં આવ્યો હતો. જોકે, આજે સ્થાયી સમિતિએ આ એજન્સીને વધુ 10 માસના કોન્ટ્રાક્ટ લંબાવી આપ્યો છે.
સ્થાયી સમિતિની બેઠક બાદ અધ્યક્ષ રાજન પટેલે માહિતી આપતા કહ્યું હતું કે, સ્થાયી સમિતિ ઠરાવ નં.1677/2022 અન્વયે અપાયેલ કામગીરી પૈકી મહત્તમ 30 ટકાની મર્યાદા એટલે કે, 9 લાખ મેટ્રિક ટન મ્યુ.ની સોલીડ વેસ્ટના પ્રોસેસિંગની વધારાની કામગીરી ઇજારદારને સોîપવા અને ઇજારાની મુદત 10 માસ અથવા વૈકલ્પિક પ્રોસેસિંગ પ્લાન્ટ કાર્યરત થાય- બે માંથી જે ઓછું હોય તે સમયગાળા સુધી, મહત્તમ રકમ 71.10 કરોડની મર્યાદામાં કરાવવા મંજૂરી આપવામાં આવી છે. આ ઇજારદાર પાસે 5 જાન્યુઆરી, 2026 બાદ ઇજારાની મુદત ઉપરાંતની કામગીરી કરાવવામાં આવી રહી છે અને કોઇ ચૂકવણી કરવામાં આવી નથી. ઇજારદાર દ્વારા લેખિતમાં આ વધારાના કામની ચૂકવણી તબક્કાવાર કરવા માટે તથા વધારાની કામગીરી પૂર્ણ થયા બાદ ખજાદ ખાતે એકત્ર કચરાનો નિકાલ 12 માસમાં કરવાની બાંહેધરી આપી છે. જો આપવામાં આવેલી બાંહેધરી પ્રમાણે ઈજારદાર કામગીરી નહીં કરે તો આગામી બે માસમાં પાલિકા નાણાકીય અને કાયદાકીય હિતને ધ્યાને રાખી ટેકનો-લીગલ કન્સલ્ટન્ટ અભિપ્રાય મેળવશે અને ત્યાર બાદ ઈજારો રદ્દ કરવા કે બ્લેક લિસ્ટ કરવાની કામગીરી પણ કરશે.
નવેસરથી ટેન્ડરમાં શરતો હળવી કરવા કવાયત
સુરત પાલિકામાં મસમોટું કચરા કૌભાંડ કરી શહેરનો કચરો ગામડામાં નાખનારા સી.ડી. ટ્રાન્સપોર્ટની જગ્યાએ નવી એજન્સી માટે પાલિકાએ ટેન્ડરનો પાંચમો પ્રયાસ કર્યો છે. પાલિકાના કચરાના જથ્થા પ્રમાણે નિયમો રાખ્યા હતા પરંતુ જે રીતે એજન્સી કૌભાંડી નીકળી અને હવે બાકીની કામગીરી કરવાની હોય નવેસરથી ટેન્ડરની શરતો હળવી કરવા માટે આયોજન થઈ રહ્યું છે.
ટેન્ડર પ્રક્રિયામાં સ્પર્ધા થાય તે માટે સ્થાયી સમિતિ દ્વારા ખજાદ ખાતે સૂચિત 1.80 લાખ ચો.મી. જગ્યામાં ત્રણ વર્ષના સમયગાળા માટે મ્યુ.ની સોલીડ વેસ્ટ પ્રોસેસિંગ પ્લાન્ટ સ્થાપિત કરવા અને પ્રોસેસિંગ-નિકાલ કરવા માટે પણ મંજૂરી આપવામાં આવી છે. ઉંબેર ખાતે આગામી 8થી 10 માસમાં પ્રોસેસિંગ પ્લાન્ટ-ડિસ્પોઝલ સાઇટ કાર્યરત થાય તો પણ ત્રણ વર્ષ સુધી પ્રોસેસિંગ પ્લાન્ટ ખજાદ ડિસ્પોઝલ સાઇટ ખાતે કાર્યરત રાખવા માટે સ્થાયી સમિતિ દ્વારા મંજૂરી આપવામાં આવી છે.
