– ફાસ્ટફૂડની દુકાને નાસ્તો કરવા આવતા શખ્સે
– ક્રેડિટકાર્ડ મારફત શખ્સે મોંઘા મોબાઇલ ફોન તેમજ રોકડ રકમ ઉપાડી છેતરપિંડી કરી
ભાવનગર : ભાવનગરમાં રહેતા બે સગા ભાઈઓને વિશ્વાસમાં લઈ અલગ-અલગ ક્રેડિટ કાર્ડ મારફત જુદી-જુદી કંપનીઓના મોબાઇલ ફોન ખરીદી તેમજ લોનના બહાને કાર્ડનો ઉપયોગ કરી શખ્સે રૂ.૧૬.૪૬ લાખની છેતરપિંડી અને વિશ્વાસઘાત કરતા શખ્સ વિરુદ્ધ ગુનો નોંધાયો છે.
ભાવનગરના ચિત્રા વિસ્તારમાં આવેલ બેન્ક કોલોનીમાં રહેતા અને સંસ્કાર મંડળ પાસે આવેલ ચસકા-મસ્કા ફાસ્ટફૂડમાં નોકરી કરતા કેતનભાઈ ગોવિંદભાઈ ચાવડા સાથે ફાસ્ટફૂડની દુકાને નાસ્તો કરવા આવતા વિજય ગોરધનભાઇ માંડલિકે પરિચય કેળવી લોન લેવા માટે સિબિલ રેકોર્ડ સુધરવા ક્રેડિટ કાર્ડ મારફત લોન લેવા સમજાવી ભાવનગરમાં આવેલ અલગ-અલગ સ્ટોરમાંથી મોંઘા મોબાઇલ ફોન ખરીદ કર્યાં હતા અને કાર્ડ મારફત તેની લોન કરવી હતી, આ ઉપરાંત ગોલ્ડ લોન તેમજ રોકડ રકમ પણ મેળવી લીધી હતી. આ ઉપરાંત કેતનભાઇના ભાઈ નીતિનભાઇને પણ વિશ્વાસમાં લઈને ક્રેડિટ કાર્ડ મારફત લોન તેમજ રોકડ વ્યવહાર કરી કુલ રૂ.૧૬,૪૧,૩૮૩ની છેતરપિંડી કરી હતી. આ બનાવ અંગે કેતનભાઈ ચાવડાએ પોલીસ ફરિયાદ નોંધાવતા નિલમબાગ પોલીસે ગુનો નોંધી તપાસ હાથ ધરી છે.
