Clinical Establishment Act: ગેરકાયદે રીતે પ્રેક્ટિસ કરતાં ભૂતિયા ડૉક્ટરો પર કાબૂ મેળવવા માટે ક્લિનિકલ એસ્ટાબ્લિશમેન્ટ એક્ટ અમલી બનાવાયો હતો પણ આ કાયદાનું જાણે સુરસુરિયુ થયુ છે. ક્લિનિક, હોસ્પિટલ નર્સિંગ હોમથી માંડીને લેબોરેટરીના ફરજિયાત રજીસ્ટ્રેશનની મુદતમાં હજુ વધારો કરવા સરકાર તૈયારી કરી છે તે જોતા લાગી રહ્યુ છે કે, આ કાયદો ગુજરાતમાં અસરકારક રીતે અમલી બને તેમ નથી. જેમ ઈમ્પેક્ટ ફીનો કાયદાનો ફિયાસ્કો થયો છે તેવી જ દશા ક્લિનિકલ એસ્ટાબ્લિશમેન્ટ એક્ટની થઈ છે.
આ પણ વાંચોઃ સુરત પાલિકાએ વિસર્જનના તહેવારને બનાવ્યો મહિલાઓનો રોજગારીનો તહેવાર
ક્લિનિકલ એસ્ટાબ્લિશમેન્ટ એક્ટ બિનઅસરકારક
ગુજરાતમાં વર્ષ 2021માં ક્લિનિકલ એસ્ટાબ્લિશમેન્ટ એક્ટ અમલમાં આવ્યો પણ હજુ સુધી આ કાયદો બિનઅસરકારક બની રહ્યો છે. ત્રણ-ત્રણ વખત કાયદામાં સુધારો કરાયો છે. આ ઉપરાંત બે વખત ફરજિયાત રજીસ્ટ્રેશનમાં વધારો કરાયો છે. હવે જ્યારે સોમવારથી ત્રણ દિવસીય વિધાનસભા સત્ર મળવા જઈ રહ્યુ છે ત્યારે ફરી ક્લિનિકલ એસ્ટેબ્લિશમેન્ટ એક્ટની મુદતમાં છ મહિનાનો વધારો કરવા રાજ્ય આરોગ્ય વિભાગે તૈયારીઓ કરી છે.
સરકારની ઈચ્છાશક્તિનો અભાવ
ક્લિનિકલ એસ્ટાબ્લિશમેન્ટ એક્ટને લીધે ગેરકાયદે રીતે પ્રેક્ટિસ કરતાં બોગસ તબીબો પર અંકુશ આવશે. પણ જે રીતે ફરજિયાત રજીસ્ટ્રેશન મામલે સરકારની ઢીલી નીતિ રહી છે તે જોતાં લાગે છે કે, સરકારની જ ઈચ્છાશક્તિ નથી. હજુય ગામડાઓમાં સ્પેશ્યાલિસ્ટ તો ઠીક, ફીઝીશિયન ડૉક્ટરો નોકરી કરવા તૈયાર નથી. મેડિકલ કોલેજમાં ભણતા વિદ્યાર્થીઓ બોન્ડ ભરવા તૈયાર છે પણ નોકરી કરવા રાજી નથી. આ પરિસ્થિતિ વચ્ચે ગામડાઓમાં બોગસ-ડીગ્રી વિનાના ડૉક્ટરોનો રાફડો ફાટ્યો છે. બીએસએમએસ ડૉક્ટર ક્લિનિક ચલાવે છે. કમ્પાઉન્ડરો ડૉકટર બની બેઠાં છે. ધો.10 પાસ લેબોરેટરી ચલાવે છે. ગ્રામ્ય વિસ્તારમાં બધુ લોલંલોલ ચાલી રહ્યું છે તેમ છતાંય ખુદ સરકાર ક્લિનિકલ એસ્ટાબ્લિશમેન્ટ એક્ટનો કડક અમલ કરાવવા તૈયાર નથી.
આ પણ વાંચોઃ બનાસકાંઠાના સુઈગામમાં 8 કલાકમાં 8 ઈંચ વરસાદ, નદીઓ બની ગાંડીતૂર, જાણો ક્યાં કેટલી મેઘમહેર
અત્યાર સુધીમાં 30-35 હજાર ક્લિનિક, હોસ્પિટલ, નર્સિંગ હોમ, લેબોરેટરીઓએ રજીસ્ટ્રેશન કરાવ્યુ છે પણ હજુ હજારો ક્લિનિક-લેબોરેટરી રજીસ્ટ્રેશન વિના ધમધમે છે. ખ્યાતિ કાંડ વખતે ડીંગો હાંકવામાં આવી હતી પણ હવે જ્યારે કડક અમલવારીની વાત આવી તો સરકાર અને રાજ્ય આરોગ્ય વિભાગે હથિયાર હેઠા મૂક્યાં છે.
