Gujarat Weather Forecast For Next 7 Days : ગુજરાતમાં પ્રી-મોન્સૂન એક્ટિવિટીના કારણે હાલ વિવિધ જિલ્લામાં વરસાદ પડી રહ્યો છે. આ દરમિયાન હવામાન વિભાગે આજથી 26 જૂન સુધીનું પૂર્વાનુમાન જાહેર કર્યું છે. જેમાં આગામી 7 દિવસ રાજ્યના વિવિધ ભાગોમાં ગાજવીજ સાથે વરસાદની સંભાવના વ્યક્ત કરવામાં આવી છે.
કઈ તારીખે અને ક્યાં જિલ્લામાં વરસાદ?
દિવસ 1 (21 જૂન સુધી): મધ્ય ગુજરાતના આણંદ, પંચમહાલ, દાહોદ, મહીસાગરમાં તથા દક્ષિણ ગુજરાતના તમામ જિલ્લાઓ અને કેન્દ્રશાસિત પ્રદેશોમાં હળવાથી મધ્યમ અને ગાજવીજ સાથે વરસાદની શક્યતા છે. તો ઉત્તર ગુજરાતના બાકીના જિલ્લાઓ અને સૌરાષ્ટ્ર-કચ્છમાં છૂટાછવાયા સ્થળે વરસાદની સંભાવના છે. જ્યારે બાકીના વિસ્તારોમાં વાતાવરણ સૂકું રહેશે.
દિવસ 2 થી 4 (22 થી 24 જૂન): મધ્ય ગુજરાતના ખેડા, અમદાવાદ, આણંદ, પંચમહાલ, મહીસાગર અને દાહોદમાં વરસાદની સંભાવના છે. તો દક્ષિણ ગુજરાતના તમામ જિલ્લાઓ અને કેન્દ્રશાસિત પ્રદેશોમાં વરસાદનું પૂર્વાનુમાન વ્યક્ત કરાયુ છે. તો સૌરાષ્ટ્રના અમુક જિલ્લાઓ જેવા કે રાજકોટ, અમરેલી, ભાવનગર, ગીર સોમનાથ, બોટાદ અને દીવમાં છૂટાછવાયા સ્થળે હળવાથી મધ્યમ વરસાદની શક્યતા છે.
દિવસ 5 થી 7 (25 થી 27 જૂન): દક્ષિણ ગુજરાતના તમામ જિલ્લાઓ, કેન્દ્રશાસિત પ્રદેશો સહિત સૌરાષ્ટ્રના અમરેલી, ભાવનગર, ગીર સોમનાથ અને દીવમાં છૂટાછવાયા સ્થળે હળવાથી મધ્યમ વરસાદની શક્યતા છે.તો ઉત્તર ગુજરાત અને બાકીના સૌરાષ્ટ્ર-કચ્છમાં વાતાવરણ સૂકું રહેવાની શક્યતા છે.
હવામાન વિભાગે ઉત્તર ગુજરાતના બનાસકાંઠા, પાટણ, સાબરકાંઠા, આણંદ, પંચમહાલ, દક્ષિણ ગુજરાતના તમામ જિલ્લાઓ અને કેન્દ્રશાસિત પ્રદેશો સહિત સૌરાષ્ટ્રના રાજકોટ, જૂનાગઢ, અમરેલી, ભાવનગર, ગીર સોમનાથ, કચ્છ અને દીવમાં 40-50 કિમી પ્રતિ કલાકની ઝડપે પવન ફૂંકાવાની સાથે ગાજવીજ અને હળવાથી મધ્યમ વરસાદની આગાહીનું અનુમાન વ્યક્ત કર્યુ છે.
