વડોદરા : સયાજી હોસ્પિટલની કેન્ટીન પાસે તપન પરમાર નામના યુવકની હત્યા
કરવાના ચકચારી બનાવમાં સંડોવાયેલી મહિલા આરોપીએ જામીન અરજી મૂકતા અદાલતે અરજી
નામંજૂર કરી હતી. ન્યાયાધીશે ચૂકાદામાં નોંધ્યું હતું કે, બે
સાક્ષીના નિવેદનમાં સ્પષ્ટ જણાય છે કે અરજદાર આરોપી ઘટના સમયે હાજર હતી અને તેણે
ઉશ્કેરણી પણ કરી હતી.
ઉલ્લેખનીય છે કે, ૧૭ નવેમ્બર ૨૦૨૪ના રોજ મરનાર તપન પરમાર અને
તેના મિત્રો એસ.એસ.જી. હોસ્પિટલ ખાતે દાખલ અન્ય મિત્રની ખબર કાઢવા ગયા હતા. તે
સમયે હોસ્પિટલની કેન્ટીન પાસે પૂર્વ આયોજીત કાવતરાના ભાગરૃપે આરોપી બાબર પઠાણ અને
તેના સાથીદારોએ તપન પરમાર પર હુમલો કર્યો હતો જેમાં તપનનું મોત થયું હતું.
આ ગુનામાં મહિલા આરોપી શબનમ વસીમ મન્સૂરીએ જામીન અરજી મૂકતા
તેની સુનાવણીમાં બચાવ પક્ષે રજૂઆત કરી હતી કે, આરોપી ૧૬ માસથી જેલમાં
છે અને તેની પુત્રીની સંભાળ રાખવા માટે તેને જામીન પર મુક્ત કરવી જોઈએ. જ્યારે
સ્પેશ્યલ સરકારી વકીલ એન.જે. ભાવસારે દલીલ કરી હતી કે, આ એક
ગંભીર પ્રકારનું ગુનાહિત કાવતરું છે. અરજદાર આરોપી બનાવ સમયે સ્થળ પર હાજર હતી અને
મરનારને માર મારવામાં સક્રિય ભૂમિકા ભજવી હતી.
સીસીટીવી ફૂટેજ તથા સાક્ષીઓના સીધા નિવેદનો જેવા સચોટ પુરાવા
હોવાથી જામીન આપવા જોઈએ નહીં. બંને પક્ષની દલીલો સાંભળ્યા બાદ ન્યાયાધીશે અરજદાર
મહિલાની જામીન અરજી નામંજૂર કરતા નોંધ્યું હતું કે,હત્યા જેવા ગંભીર ગુનામાં
આરોપીની સંડોવણીના પૂરતા પુરાવા જણાય છે અને ચાર્જશીટ રજૂ થયા બાદ પણ સંજોગોમાં
કોઈ મોટો ફેરફાર થયો નથી.
