મુંબઈ : મુંબઈ ઝવેરી બજારમાં આજે ચાંદીના ભાવમાં તેજી વેગથી આગળ વધી હતી. સોનામાં પણ ધીમી આગેકૂચ જોવા મળી હતી. મુંબઈ બુલિયન બજારમાં ચાંદીના ભાવ કિલોના બુધવારે રૂ.૯૦૦૦ વધ્યા પછી આજે ભાવ વધુ રૂ.૫૦૦૦ ઉછળતાં બે દિવસમાં ભાવ રૂ.૧૪ હજાર વધી ગયા હોવાનુંમ બજારના જાણકારોએ જણાવ્યું હતું. વિશ્વ બજાર ઉછળતાં ઘરઆંગણે ઈમ્પોર્ટ વધતાં દેશના ઝવેરી બજારોમાં તેજી જોવા મળી હતી.
વિશ્વ બજારમાં ચાંદીના ભાવ ઔંસના ૭૬.૨૬ ડોલરથી વધી ઉંચામાં ભાવ ૮૧.૩૯ થઈ ૮૧.૩૮ ડોલર રહ્યા હતા. વૈશ્વિક સોનાના ભાવ ભાવ ઔંસના ૪૬૬૯થી વધી ૪૭૫૩ થઈ ૪૭૪૪થી ૪૭૪૫ ડોલર રહ્યા હતા. દરમિયાન, વિશ્વ બજાર પાછળ ઘરઆંગણે અમદાવાદ બજારમાં આજે ચાંદીના ભાવ કિલોના વધુ રૂ.૪૦૦૦ ઉછળ્યા હતા.
અમદાવાદ ચાંદીના ભાવ વધી રૂ.૨ લાખ ૫૦ હજાર થયા હતા. અમદાવાદ સોનાના ભાવ ૧૦ ગ્રામના ૯૯૫ના રૂ.૧૫૫૨૦૦ રહ્યા હતા. વિશ્વ બજારમાં ડોલર ઈન્ડેક્સ ઘટતાં વૈશ્વિક સોનામાં ફંડોનું બાઈંગ વધ્યાના વાવડ હતા. દરમિયાન, મુંબઈ બુલિયન બજારમાં આજે ચાંદીના ભાવ વધી જીએસટી વગર રૂ.૨૫૪૭૯૮ રહ્યા હતા. મુંબઈ સોનાના ભાવ રૂ.૨૦૦ વધી જીએસટી વગર ભાવ ૯૯૫ના રૂ.૧૫૦૫૪૪ તથા ૯૯૯ના રૂ.૧૫૧૧૪૯ રહ્યા હતા.
દરમિયાન, ઈરાન-અમેરિકા વચ્ચે શાંતિની આશા વધતાં વિશ્વ બજારમાં આજે ક્રૂડતેલના ભાવ વધુ તૂટયા હતા. બ્રેન્ટ ક્રૂડના ભાવ બેરલના ઉંચામાં ૧૦૨.૫૫ ડોલર થયા પછી ગબડી ૯૭.૪૪ થઈ ૯૮.૧૫ ડોલર રહ્યા હતા. જ્યારે યુએસ ક્રૂડના ભાવ ઉંચામાં ૯૬.૪૮ થઈ નીચામાં ભાવ ૯૧.૩૩ થઈ ૯૧.૯૮ડોલર રહ્યા હતા.
દરમિયાન, અમેરિકાએ જે રિફાઈનર્સ પર પ્રતિબંધો મૂક્યા છે તે રિફાઈનર્સને ધિરાણ નહિં આપવાનું ચીનની સરકારે બેન્કોને જણાવ્યું હોવાના સમાચાર હતા.ઓમોન બંદરે ઓઈલની હેરફેર રુંધાઈ છે. ત્યાં ઓઈલનો ભરાવો થયો છે. દરમિયાન, વિશ્વ બજારમાં આજે પ્લેટીનમના ભાવ ઔંસના ૨૦૦૮થી વધી ૨૧૦૧થી ૨૧૦૨ ડોલર રહ્યા હતા જ્યારે પેલેડીયમના ભાવ ૧૫૩૨થી વધી ૧૫૬૪ થઈ ૧૫૪૪થી ૧૫૪૫ ડોલર રહ્યા હતા. વૈશ્વિક કોપરના ભાવ આજે વધુ ૦.૫૨ ટકા વધ્યા હતા.
દરમિયાન, મુંબઈ બુલિયન બજારમાં આજે પ્લેટીનમના ભાવ ૧૦ ગ્રામના રૂ.૬૫૫૧૯ વાળા રૂ.૬૯૮૬૫ થઈ ૬૬૭૧૮ રહ્યા હતા. દરમિયાન, વર્લ્ડ ગોલ્ડ કાઉન્સિલના જણાવ્યા મુજબ વૈશ્વિક સ્તરે દસ મહિના પછી તાજેતરમાં પ્રથમ વખત વિવિધ દેશોની સેન્ટ્રલ બેન્કો ગોલ્ડમાં નેટ બાય..ર્સના બદલે નેટ સેલર્સ તરીકે ઉતરી છે. રશિયા તથા તુર્કીએ સહિત વિવિધ દેશોની સેન્ટ્રલ બેન્કોએ આશરે ૬૫થી ૭૦ ટન સોનું વેંચ્યાના વાવડ હતા.
