અમદાવાદ, મુંબઈ : આર્થિક અનિશ્ચિતતા તથા સેફ હેવન ઈન્વેસ્ટમેન્ટ માટે થઈ રહેલા ધસારાને કારણે વિશ્વ બજારમાં ગોલ્ડની અવિરત તેજી અટકવાનું નામ લેતી નથી. વિશ્વ બજારમાં સોનાની ૪૦૦૦ ડોલર તરફ આગેકૂચ રહી હતી. આ અહેવાલો પાછળ આજે અમાદાવાદ સોના-ચાંદી બજારમાં ચાંદી રૂ.૧,૫૪,૦૦૦ તથા સોનું રૂ.૧,૨૪,૫૦૦ની વિક્રમી સપાટીએ પહોંચ્યા હતા.
વ્યાજ દરમાં ઘટાડો, અમેરિકન ડોલરમાં નબળાઈ તથા કેન્દ્રીય બેન્કો દ્વારા સતત ચાલુ રહેલી ખરીદીને કારણે પણ સોનાના ભાવને ટેકો મળી રહે છે. અમેરિકન ફેડરલ રિઝર્વ જો વ્યાજ દરમાં ઘટાડો કરશે તો ડોલર વધુ નબળો પડશે અને આવી સ્થિતિમાં સોનાના ભાવ વધુ ઊંચકાવાની રોકાણકારો અપેક્ષા રાખી રહ્યા છે. વિશ્વ બજાર પાછળ ઘરઆંગણે સોનાચાંદીમાં રોજેરોજ નવો રેેકોર્ડ જોવા મળી રહ્યો છે. ક્રુડ તેલમાં ભાવ વધતા અટકયા હતા.
અમદાવાદ બજારમાં સોનુ ૯૯.૯૦ પ્રતિ દસ ગ્રામ રૂપિયા ૧,૨૪,૫૦૦જ્યારે ૯૯.૫૦ના દસ ગ્રામના ભાવ રૂપિયા ૧,૨૪,૨૦૦ કવોટ થતા હતા. ચાંદી .૯૯૯ એક કિલોના રૂપિયા ૨૦૦૦ વધી રૂપિયા ૧,૫૪,૦૦૦ બોલાતા હતા.
મુંબઈ બજારમાં સોનુ ૯૯.૯૦ દસ ગ્રામ જીએસટી વગર રૂપિયા ૧,૧૯,૯૪૧ બોલાતા હતા. જીએસટી સાથે ભાવ ત્રણ ટકા ઊંચા એટલે કે રૂપિયા ૧,૨૩,૫૩૮ મુકાતુ હતું. ૯૯.૫૦ સોનાના દસ ગ્રામના જીએસટી વગર રૂપિયા ૧,૧૯,૪૬૧ બોલાતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગર રૂપિયા ૧,૪૯,૪૪૧ બોલાતા હતા. જીએસટી સાથે ત્રણ ટકા ઊંચા એટલે કે રૂપિયા ૧,૫૩,૯૨૩ મુકાતા હતા.
વિશ્વ બજારમાં સોનુ પ્રતિ ઔંસ ઉપરમાં ૩૯૮૫ ડોલર અને નીચામાં ૩૯૪૧ ડોલર થઈ મોડી સાંજે ૩૯૮૧ ડોલર મુકાતુ હતું. ચાંદી ઔંસ દીઠ ૪૮.૪૦ ડોલર સાથે લગભગ સ્થિર રહી હતી. અન્ય કિંમતી ધાતુ પ્લેટિનમ ૧૬૩૫ ડોલર અને પેલેડિયમ પ્રતિ ઔંસ ઊંચકાઈને ૧૩૫૫ ડોલર મુકાતુ હતું. સોનામાં એકધારી તેજી માટે વિવિધ કારણો કામ કરી રહ્યાનું બજારના વર્તુળો માની રહ્યા છે. ભારત તથા ચીન સહિતની કેટલાક દેશોની કેન્દ્રીય બેન્કો દ્વારા ખરીદી, ડોલરમાં નબળાઈ, ગોલ્ડ ઈટીએફસમાં વધી રહેલા ઈન્ફલોસ જેવા પરિબળો વૈશ્વિક સોનાના ભાવને ટેકો આપી રહ્યા છે.
વિશ્વ બજારમાં ક્રુડ તેલનો માલભરાવો થવાની ધારણાંએ ઓપેક દ્વારા ઉત્પાદનમાં સાવચેતીભર્યો વધારો કરાશે તેવા અહેવાલે ક્રુડ તેલના ભાવ વધતા અટકી સ્થિર જોવા મળ્યા હતા. નાયમેકસ ડબ્લ્યુટીઆઈ પ્રતિ બેરલ ૬૧.૨૬ડોલર જ્યારે આઈસીઈ બ્રેન્ટ ક્રુડ ઓઈલ મોડી સાંજે પ્રતિ બેરલ ૬૫ ડોલર મુકાતું હતું.
