મુંબઈ : ભારતમાં ચીનના અનેક પ્રોડકટસના ડમ્પિંગને કારણે સ્થાનિક ઉદ્યોગોને વ્યાપક નુકસાન થઈ રહ્યું છે ત્યારે અમેરિકા દ્વારા લાગુ કરાયેલા ટેરિફ વચ્ચે ચીનની ફેશન જ્વેલરીની દેશમાં વધી રહેલી સસ્તી આયાત ભારતના ફેશન જ્વેલરીના સર્જકો માટે મોટી ચિંતાનો વિષય બની રહ્યો છે.
ભારતની ફેશન જ્વેલરી બજારમાં ચીનનો હિસ્સો જે નાણાં વર્ષ ૨૦૧૯-૨૦માં ૨૫ ટકા હતો તે ગત નાણાં વર્ષમાં વધી ૫૦ ટકા પર પહોંચી ગયાનું ઉદ્યોગના સુત્રો દાવો કરી રહ્યા છે. એન્ટી ડમ્પિંગ ડયૂટીમાંથી બચવા માટે ફેશન જ્વેલરીના આયાતકારો કથિત રીતે ખોટા ડિકલેરેશન ઉપરાંત અન્ડર ઈન્વોઈસિંગ જેવી ચાલાકી કરી રહ્યા છે. તેમની આ કહેવાતી ચાલાકીને કારણે ચીનની જ્વેલરી ભારતની આવા પ્રકારની જ્વેલરીની સરખામણીએ ઘણી સસ્તી પડે છે.
નાણાં વર્ષ ૨૦૧૯-૨૦માં ભારતની ફેશન જ્વેલરી બજારનું કદ જે રૂપિયા ૩૦,૦૦૦ કરોડ જેટલું હતું તે નાણાં વર્ષ ૨૦૨૪-૨૫માં વધી રૂપિયા ૪૦,૦૦૦ કરોડ પર પહોંચી ગયું છે. ચીનની જ્વેલરી પર એન્ટી ડમ્પિંગ ડયૂટી છતાં ભારતના આયાતકારો કહેવાતી ગેરરીતિ દ્વારા ચીનના માલને ભારતમાં ઘૂસવા દે છે, એ કમનશીબી છે, એમ સુત્રોએ જણાવ્યું હતું. ટ્રમ્પ દ્વારા લાગુ કરાયેલા ઊંચા ટેરિફને કારણે ઉદ્યોગને વધુ માર પડવાની શકયતા નકારાતી નથી.
અલગ જ એચએસએન કોડ મારફત ડયૂટીની વ્યાપક ચોરી થતી હોવાનો દાવો કરવામાં આવી રહ્યો છે. આ અંગે સરકારનું ધ્યાન પણ દોરવામાં આવ્યું છે. ફેશન જ્વેલરીની આયાત ૭૧૧૭ એચએસએન કોડ હેઠળ કરવાની રહે છે પરંતુ કેટલાક આયાતકારો તેને અલગ જ નામ હેઠળ આયાત કરી રહ્યા છે.
એચએસએન કોડ હેઠળના માલ પર પ્રતિ કિલો રૂપિયા ૬૦૦ અથવા મૂલ્યના ૨૫ ટકા આ બેમાંથી જે વધુ હોય તેટલી ડયૂટી વસૂલવામાં આવે છે. ફેશન જ્વેલરી ઉદ્યોગ માટે મુંબઈ એક મોટું મથક હોવાથી અહીંના કારોબારીઓને ચીનના સસ્તા માલથી મોટો ફટકો પડી રહ્યાનું પણ જણાવાયું હતુ.
