Lift Collapses At Private Power Plant In Chhattisgarh: છત્તીસગઢમાં આજે મોટી દુર્ઘટના સર્જાઈ છે. સક્તી જિલ્લામાં એક પ્રાઈવેટ પાવર પ્લાન્ટમાં લિફ્ટ તૂટી પડી છે. આ દુર્ઘટનામાં ચાર લોકોના મોત થયા છે, જ્યારે છ લોકો ગંભીર રીતે ઘાયલ થયા છે. આ દુર્ઘટના અંગે પોલીસે જણાવ્યું કે, આ દુર્ઘટના ઉચ્ચપિંડા ગામના ડભરા વિસ્તારમાં આવેલા આરકેએમ પાવરજેન પ્રાઈવેટ લિમિટેડ પ્લાન્ટમાં બની છે.
સક્તી જિલ્લાના એસપી અંકિતા શર્માએ જણાવ્યું કે, ’10 કર્મચારીઓ પોતાની શિફ્ટ પૂરી કરીને નીચે ઉતરી રહ્યા હતા ત્યારે અચાનક લિફ્ટ ધરાશાયી થઈ ગઈ હતી. દુર્ઘટના બાદ ઘાયલોને રાયગઢની જિંદલ ફોર્ટિસ હોસ્પિટલમાં સારવાર માટે ખસેડવામાં આવ્યા હતા. ત્યાં સારવાર દરમિયાન ચાર લોકોના મોત થઈ ગયા છે. બીજી તરફ અન્ય છ ઘાયલોની સારવાર ચાલી રહી છે.’
આ પણ વાંચો: રશિયાએ યુક્રેનના 5000 ચો.કિ.મી. વિસ્તાર પર કબજો મેળવ્યો, યુદ્ધ વચ્ચે પુતિનનો દાવો
એસપી શર્માએ આગળ જણાવ્યું કે, ‘લિફ્ટની ક્ષમતા લગભગ 2,000 કિલોગ્રામ છે અને તાજેતરમાં જ 29 સપ્ટેમ્બરના રોજ જાળવણી કાર્ય કરવામાં આવ્યું હતું. ઘટનાનું કારણ જાણવા માટે તપાસ ચાલી રહી છે.’
