રૂ. 2કરોડના અંગ્રેજી દારૂના કેસમાં વોન્ટેડ હતો આરોપી હિતેશ ઉર્ફે વાંગો : બાંભણીયા વિરૂદ્ધ ખૂન, ખૂનની કોશીષ, મારામારી, દારૂના 19 ગુના નોંધાયેલા છે
રાજકોટ, : રૂ. 2 કરોડના અંગ્રેજી દારૂના કેસમાં છેલ્લા બે મહિનાથી વોન્ટેડ જામનગરના વોર્ડ નં. 10ના ભાજપના નવનિયુક્ત કોર્પોરેટર મંજુબેન નરશીંભાઇ બાંભણીયાના પુત્ર હિતેશ ઉર્ફે વાંગાને રાજકોટ રેન્જ પોલીસની ટીમે ચોટીલાથી ઝડપી લીધો હતો. તેનો વાંકાનેર પોલીસે કબજો મેળવી તપાસ હાથ ધરી છે.
વાંકાનેર તાલુકા પોલીસમાં રૂ. 2 કરોડના અંગ્રેજી દારૂના કેસમાં હિતેશ ઉર્ફે વાંગો છેલ્લા 2 માસથી વોન્ટેડ હતો. રાજકોટ રેન્જના એએસઆઇ સંદીપસિંહ ઝાલા વગેરેને મળેલી બાતમીના આધારે પીએસઆઇ સી.એમ.કાંટેલીયાએ તેને ચોટીલામાં આવેલી એક હોટલ નજીકથી ઝડપી લીધો હતો. આરોપી હિતેશ ઉર્ફે વાંગો રીઢો આરોપી છે. લાંબો ગુનાઇત ઇતિહાસ ધરાવે છે. પોલીસના જણાવ્યા પ્રમાણે તેના વિરૂદ્ધ અત્યાર સુધીમાં ખૂનના બે2, ખૂનની કોશિષના 2, ધાડ પાડવાની તૈયારીનો 1, મારામારીના 6, પ્રિઝન એક્ટ એટલે કે જાહેરનામા ભંગનો 1, બગાડના 2, અંગ્રેજી દારૂના કબજાના 4 અને દારૂ પીવાનો એક મળી કુલ 19 ગુના નોંધાયા છે.
છેલ્લે 2024મા તેના વિરૂદ્ધ જામનગર પંચ. એ.ડિવિઝન પોલીસ સ્ટેશનમાં ખૂનની કોશિષનો ગુનો નોંધાયો હતો. જ્યારે પ્રોહિબિશનનો છેલ્લો ગુનો 2023માં જામનગર સિટી બી.ડિવિઝન પોલીસ મથકમાં નોંધાયો હતો. બે મહિના પહેલા વાંકાનેરમાંથી પકડાયેલા રૂ. 2 કરોડના દારૂના કેસમાં પણ તેનું નામ ખુલતાં ભાગી ગયો હતો. સ્થાનિક સ્વરાજ્યની ચૂંટણી વખતે વોન્ટેડ આરોપીઓને પકડવાની ઝુંબેશ વખતે પોલીસે તેની શોધખોળ કરી હતી. પરંતુ હાથમાં આવ્યો ન હતો.
