– મહુવામાં પોણો ઈંચ વરસાદથી વાતાવરણમાં ઠંડક પ્રસરી
– જેસરમાં વીજ ગર્જના સાથે ધોધમાર અર્ધો ઈંચ, ઉમરાળા, સિહોર, ગારિયાધારમાં પા ઈંચ અને ઘોઘા, પાલિતાણામાં ઝાપટું વરસ્યું : સમઢિયાળા ગામે વીજ ટ્રાન્સફોર્મર ઉપર વીજળી પડી
તળાજા/જેસર : ભાવનગર જિલ્લામાં પૂર્વ આગાહી મુજબ મેઘરાજાની વીજળીના કડાકા-ભડાકા સાથે એન્ટ્રી થઈ હતી. જિલ્લાના આઠ તાલુકામાં ઝાપટાંથી લઈ દોઢ ઈંચ સુધી ધોધમાર વરસાદ પડયો હતો.
તળાજામાં સાંજે ધીમીધાર બાદ વીજ કડાકા સાથે દોઢ કલાકમાં ધોધમાર વરસાદ ખાબકી જતાં નીચાણવાળા વિસ્તારો ગોપનાથ રોડ, શિવાજીનગર, ગોરખી રોડ, દિનદયાળનગર, અબ્બાસ ચોકથી લક્ષ્મીનગર સહિતના વિસ્તારોમાં વરસાદી પાણી ભરાયા હતા. વરસાદના આગમન સાથે જ વીજળી ડૂલ થઈ ગઈ હતી. તાલુકાના શોભાવડ, સાંગાણા, કામરોળ, રોયલ, દકાના, વેરાવળ, ગોરખી સહિતના ગામોમાં પણ ઓછાવત્તા પ્રમાણમાં વરસાદ વરસ્યો હતો. સમઢિયાળા ગામે પ્લોટ વિસ્તારમાં વીજળી પડતા વીજ ટ્રાન્સફોર્મર બળી ગયું હતું.
જેસરમાં લાંબા વિરામ બાદ સાંજે ચાર કલાક પછી વીજળીના ચમકારા અને કડાકા-ભડાકા સાથે એક કલાકમાં અર્ધો ઈંચ વરસાદ ખાબકી ગયો હતો. વરસાદના પગલે ખેડૂતોમાં આનંદ છવાયો હતો. તેમજ મહુવા પંથકમાં પણ મેઘરાજાની ધમાકેદાર એન્ટ્રી થઈ હતી. સાંજે પોણો ઈંચથી વધુ પાણી વરસ્યું હતું. આ ઉપરાંત સિહોર, ગારિયાધાર અને ઉમરાળામાં પા ઈંચ, ઘોઘા અને પાલિતાણામાં ઝાપટું વરસી ગયું હતું. ભાવનગરમાં કાળાડિબાંગ વાદળો છુટાછવાયા વરસ્યા હતા. સાંજે વીજ ગર્જના સાંભળવા મળી હતી. વધુમાં હવામાન વિભાગે ૨૩મી સુધી વરસાદની આગાહી કરી છે.
ગઢડામાં મૂશળધાર દોઢ ઈંચ વરસાદ
ગઢડા પંથકમાં મોડી સાંજે અચાનક વરસાદી વાતાવરણ વચ્ચે વીજળીના બિહામણાં કડાકા-ભડાકા સાથે મૂશળધાર દોઢ ઈંચ વરસાદ વરસ્યો હતો. કુદરતના રોદ્ર સ્વરૂપનો અનુભવ થતાં લોકોએ બહાર નીકળવાનું ટાળી ઘરમાં જ પૂરાઈ રહેવાનું સલામત સમજ્યું હતું. કોઈ જગ્યાએ વીજળી પડી હોવાની પણ લોકોએ સંભાવના વ્યક્ત કરી હતી. ઉલ્લેખનિય છે કે, ગઈકાલે શુક્રવારે બોટાદમાં રાત્રિના સમયે વરસાદ વરસ્યો હતો.
