GSEB Result 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ 12 સામાન્ય પ્રવાહ અને વિજ્ઞાન પ્રવાહનું પરિણામ જાહેર કરવામાં આવ્યું છે. જેમાં વિજ્ઞાન પ્રવાહનું 84.33% અને સામાન્ય પ્રવાહનું 92.71% પરિણામ જાહેર થયું છે. આ વર્ષના પરિણામોમાં ફરી એકવાર વિદ્યાર્થીઓ કરતા વિદ્યાર્થીનીઓએ મેદાન માર્યું છે. જેમાં ઘણી શાળાઓએ સારો દેખાવ કર્યો છે. બોર્ડની આ પરીક્ષામાં રાજ્યના વિવિધ કેન્દ્રો અને જિલ્લાઓ વચ્ચે પરિણામની ટકાવારીમાં મોટો તફાવત પણ જોવા મળ્યો છે.
વિદ્યાર્થિનીઓ આગળ
સામાન્ય પ્રવાહના પરિણામની વિગતવાર વાત કરીએ તો, આ વર્ષે વિદ્યાર્થીઓનું કુલ પરિણામ 90.10% નોંધાયું છે, જેની સામે વિદ્યાર્થિનીઓનું પરિણામ 95.41% રહ્યું છે. આમ વિદ્યાર્થિનીઓનું પરિણામ વિદ્યાર્થીઓ કરતા 5.31% વધારે આવ્યું છે. રાજ્યમાં તડાવ, કોટડા, કાંગવાઇ અને પ્રશ્નાવાડા એમ ચાર કેન્દ્રોએ 100 ટકા પરિણામ મેળવીને ટોચનું સ્થાન પ્રાપ્ત કર્યું છે, જ્યારે કારઠ કેન્દ્ર 64.88% પરિણામ સાથે સૌથી નીચે રહ્યું છે.
જિલ્લાવાર પરિણામમાં આહવા-ડાંગ જિલ્લો 97.88% સાથે રાજ્યમાં પ્રથમ ક્રમે રહ્યો છે, જ્યારે અમદાવાદ શહેરનું પરિણામ સૌથી ઓછું 87.10% નોંધાયું છે. ઉલ્લેખનીય છે કે, સામાન્ય પ્રવાહની કુલ 2030 શાળાઓએ 100% પરિણામ મેળવવાની સિદ્ધિ હાંસલ કરી છે.
આ પણ વાંચો: ધોરણ 12નું પરિણામ જાહેર, સાયન્સનું 84.33% તો સા.પ્રવાહનું 92.71% રિઝલ્ટ, આ રીતે કરો ચેક
ધોરણ 12 વિજ્ઞાન પ્રવાહમાં પણ વિદ્યાર્થીઓના સારા આંકડા સામે આવ્યા છે. વિજ્ઞાન પ્રવાહમાં કુંભારીયા કેન્દ્ર 98.62% પરિણામ સાથે રાજ્યમાં સૌથી વધુ પરિણામ ધરાવતું કેન્દ્ર બન્યું છે, જ્યારે દાહોદ જિલ્લાનું લીમડી કેન્દ્ર 42.98% સાથે સૌથી ઓછું પરિણામ ધરાવતું કેન્દ્ર રહ્યું છે.
જિલ્લાઓની સરખામણીમાં મોરબી જિલ્લો 94.85% પરિણામ સાથે સમગ્ર રાજ્યમાં મોખરે રહ્યો છે, જ્યારે દાહોદ જિલ્લો 57.44% સાથે સૌથી નબળું પરિણામ ધરાવતો જિલ્લો સાબિત થયો છે. વિજ્ઞાન પ્રવાહની કુલ 209 શાળાઓએ 100% પરિણામ મેળવીને શાળાનું ગૌરવ વધાર્યું છે.
