મુંબઈ : નબળી લોન વૃદ્ધિ તથા વ્યાજના માર્જિન પર દબાણને પરિણામે દેશની લિસ્ટેડ કમર્સિઅલ બેન્કોના વર્તમાન નાણાં વર્ષના પ્રથમ ત્રિમાસિકના નફા પર અસર જોવા મળવાની ધારણાં મૂકવામાં આવી રહી છે. લિસ્ટેડ બેન્કોના એકંદર નેટ પ્રોફિટમાં વાર્ષિક ધોરણે ૪.૫૦ ટકા જેટલું ગાબડુ પડવાનો એક રિપોર્ટમાં અંદાજ મૂકવામાં આવ્યો છે.
માર્ચ ત્રિમાસિકની સરખામણીએ નફામાં ૨.૨૫ ટકા જેટલો ઘટાડો જોવા મળવાની પણ ધારણાં મૂકવામાં આવી છે.
દેશની ૧૮ લિસ્ટેડ બેન્કોના કામકાજના કરાયેલા વિશ્લેષણમાં નેટ ઈન્ટરેસ્ટ ઈન્કમમાં વાર્ષિક ધોરણે ૨.૨૦ ટકા જેટલી સાધારણ જ વૃદ્ધિ થવાની રિપોર્ટમાં ધારણાં મૂકવામાં આવી છે.
રિઝર્વ બેન્ક દ્વારા તાજેતરમાં વ્યાજ દરમાં કરાયેલા ઘટાડાનો લાભ બેન્કો લોનધારકોને પૂરો પાડી રહ્યા છે જેને પરિણામે વ્યાજ મારફતની આવક પર અસર પડી રહી હોવાનું રિપોર્ટમાં નોંધવામાં આવ્યું છે.
જો કે બેન્કોએ થાપણ તથા સેવિંગ્સ પરના દર પણ ઘટાડયા છે પરંતુ આવા પ્રકારની જવાબદારીઓ નિશ્ચિત પ્રકારની હોવાથી તેના લાભ જોવા મળવામાં સમય લાગે છે. પાછલા ક્વાર્ટરમાં ચોખ્ખા નફાના ચાર્જ અને ટ્રેઝરી લાભ જેવી બિન-ઓપરેટિંગ આવક દ્વારા મદદ મળી હતી. જો કે, આ ક્વાર્ટરમાં ધીમી આવકની અપેક્ષા છે.
જો કે, સરકારી સિક્યોરિટીઝ પર ઉપજમાં ઘટાડો બિન-વ્યાજ આવકને વેગ આપી શકે છે. સંપત્તિ ગુણવત્તાના મોરચે, વિશ્લેષકો અપેક્ષા રાખે છે કે બેંકો પ્રથમ ક્વાર્ટરમાં નવા ડિફોલ્ટના ઉચ્ચ સ્તરની જાણ કરશે. આનું કારણ અસુરક્ષિત છૂટક લોન અને માઇક્રોફાઇનાન્સ સેગમેન્ટમાં ઉચ્ચ જોખમ છે.
