Vadodara : શહેરમાં પાણીની સમસ્યા વચ્ચે વોર્ડ નંબર 14ના વિવિધ વિસ્તારોમાં લાંબા સમયથી બંધ હાલતમાં રહેલા હેન્ડ પંપોને તાત્કાલિક શરૂ કરાવવા કોંગ્રેસના મહિલા કાઉન્સિલરે પાણી પુરવઠા વિભાગના કાર્યપાલક ઇજનેરને રજૂઆત કરી છે. રજૂઆતમાં જણાવાયું છે કે હાલ શહેરમાં પાણી અંગે વ્યાપક ફરિયાદો વચ્ચે બંધ પડેલા હેન્ડ પંપો લોકોને મળતી વૈકલ્પિક પાણીની સુવિધા પણ છીનવી રહ્યા છે.
રજૂઆત મુજબ વોર્ડ નંબર 14માં પાણીગેટ પોલીસ સ્ટેશન સામે, ખારીવાવ રોડ, ગાજરાવાડી, નાલબંધ વાડા, મોટી છીપવાડ, બાજવાડા, રાજપુરાની પોળ, પ્રતાપ પોળ, ખેડકર ફળિયા, ગોળ ગસ્તે ખાંચો, સુલેમાની પોળ, નાની છીપવાડ, ભદ્ર કચેરી પાસે, કાલુપુરા મટન માર્કેટ પાસે, લીમવાલી મસ્જિદ-પાણીગેટ વિસ્તાર તેમજ ભાસ્કર ફળિયા સહિતના અનેક સ્થળોએ હેન્ડ પંપો બંધ હાલતમાં છે.
કાઉન્સિલરે જણાવ્યું છે કે શહેરમાં એક તરફ પાણી પુરવઠા અંગે કકળાટ મચ્યો છે અને બીજી તરફ નાગરિકોને રાહત આપી શકે તેવા હેન્ડ પંપો કાર્યરત નથી. જેના કારણે મ્યુનિસિપલ કોર્પોરેશનની જાળવણી અને પાણી વ્યવસ્થાપન અંગે પણ સવાલો ઊભા થઈ રહ્યા છે.
રજૂઆતમાં માંગ કરવામાં આવી છે કે વોર્ડ નંબર 14ના તમામ બંધ હેન્ડ પંપોનું તાત્કાલિક સમારકામ કરીને તેમને કાર્યરત કરવામાં આવે.
અત્રે ઉલ્લેખનીય છે કે, શહેરના અન્ય વિસ્તારોમાં આવેલા હેન્ડ પંપોની પણ ચકાસણી હાથ ધરી જ્યાં હેન્ડ પંપ બંધ હાલતમાં હોય ત્યાં તાત્કાલિક મરામત અને પુનઃશરૂઆત કરવામાં આવે, જેથી પાણીની સમસ્યાનો સામનો કરી રહેલા નાગરિકોને આંશિક રાહત મળી શકે.
