વડોદરા, તા.24 કરજણ પોલીસે રેશનિંગ દુકાનમાં પહોંચાડવાનો સરકારી ઘઉં, ચોખા તેમજ ચણાનો જથ્થો ભરેલો ટેમ્પો ઝડપી પાડયા બાદ પુરવઠા વિભાગ સફાળું જાગ્યું છે. આ જથ્થો પાદરા સરકારી અનાજના ગોડાઉનમાંથી નીકળ્યો હોવાની વિગતો બહાર આવતાં જ પુરવઠા વિભાગની ટીમે આજે પાદરાના સરકારી અનાજના ગોડાઉનમાં દરોડો પાડી તપાસ હાથ ધરી હતી.
કરજણના જૂનાબજાર વિસ્તારમાં નેશનલ હાઇવે પર શિવવાડી મંદિરની પાછળ નર્મદા કેનાલના કાચા રસ્તા પરથી બિલ વગરનો સરકારી અનાજનો જથ્થો સગેવગે કરવા એક આઇસર ટેમ્પોમાં પસાર થાય છે તેવી માહિતીના આધારે કરજણ પોલીસે વોચ ગોઠવી આઇસર ગાડી ઝડપી પાડી સરકારી ઘઉં, ચોખા તેમજ ચણાની ગુણોનો મોટો જથ્થો ઝડપી પાડી ડ્રાઇવર કાનાભાઇ કાળુભાઇ મીર (રહે.જૂનાબજાર, કરજણ)ની અટકાયત કરી હતી.
બિલ વગરનો સરકારી જથ્થો પાદરા સરકારી અનાજના ગોડાઉનમાંથી ભરીને તેને છૂટક અલગ અલગ વેપારીઓને મળી વેચાણ આપવાનો હોવાનું ડ્રાઇવરે જણાવતા પોલીસે કાયદેસરની કાર્યવાહી હાથ ધરી હતી. પુરવઠાખાતાના ગોડાઉનમાંથી અનાજનો પુરવઠો બારોબાર વગે કરાતો હોવાનો પોલીસે પર્દાફાશ કર્યા બાદ પુરવઠા વિભાગની ટીમો જાગી હતી. આજે પાદરાના મામલતદાર તેમજ અન્ય સ્ટાફે સરકારી અનાજના ગોડાઉનમાં દરોડો પાડી તપાસ શરૃ કરતાં કાળાબજારીઓમાં ફફડાટ ફેલાયો હતો.
જિલ્લા પુરવઠા અધિકારીએ જણાવ્યું હતું કે અમે પોલીસ પાસે પણ રિપોર્ટ માંગ્યો છે તેમજ મામલતદારની ટીમ દ્વારા ગોડાઉનમાં ચેકિંગ હાથ ધરાયું છે. દુકાનદારોના સ્ટોકની પણ ગણતરી હાથ ધરાઇ છે. ઊંડી તપાસ બાદ એક રિપોર્ટ તૈયાર થશે અને તેના આધારે કાર્યવાહી કરાશે. ગોડાઉન મેનેજરની પણ જથ્થો વગે કરવાના કિસ્સામાં પૂછપરછ કરવામાં આવી રહી છે.
