વડોદરાઃ પ્રેમની આડમાં વાસનાનો ખેલ ખેલી યુવતીઓની જિંદગી બરબાદ કરવાના અનેક કિસ્સાઓ બની રહ્યા છે ત્યારે વડોદરામાં આજે ગોરવા અને લક્ષ્મીપુરા વિસ્તારમાં બનેલા આ જ પ્રકારના જુદાજુદા બે કિસ્સા યુવતીઓ અને વાલીઓ માટે લાલબત્તી સમાન છે.બંને બનાવોમાં ગર્ભવતી બનેલી પીડિતાની સાથે તેમના વાલીઓ પણ ક્ષોભજનક સ્થિતિમાં મુકાઇ જતાં આખરે તેમણે પોલીસની મદદ લીધી છે.પોલીસે બળાત્કારના બે ગુના નોંધી આરોપીઓ સામે કાર્યવાહી હાથ ધરી છે.
ગોરવામાં શ્રમજીવી યુવકે ગર્ભપાત કરાવવા ગોળીઓ
આપતાં મૃતબાળક જનમ્યું,યુવકે બીજે લગ્ન કરી લીધા
ગોત્રી પાણીની ટાંકી પાસે રહેતો મૂળ દાહોદના બીયામાળી ગામનો વતની વિપુલ સોમાભાઇ વસૈયા વડોદરામાં રહીને મજૂરી કામ કરતો હતો.
વિપુલને એક શ્રમજીવી યુવતી સાથે પરિચય થતાં બંને પ્રેમમાં પડયા હતા.વિપુલે લગ્ન કરવાની લાલચ આપી યુવતી સાથે શારીરિક સબંધ રાખવાનો આગ્રહ કર્યો હતો અને મધુનગર વિસ્તારમાં સબંધ બાંધ્યો હતો.
થોડા સમય પછી યુવતી ગર્ભવતી બનતાં વિપુલે લગ્નનો ઇનકાર કર્યો હતો અને બીજે લગ્ન કરી લીધા હતા.તેણે પીડિતાને ગર્ભપાત કરાવવા માટે ગોળીઓ આપી હતી.જેને કારણે તેને મૃત બાળક જન્મ્યું હતું.આખરે પીડિતાએ ગોરવા પોલીસને જાણ કરતાં પીઆઇ કિરિટ લાઠીયાએ ગુનો નોંધ્યો છે.
મોસાળમાં આવેલા કિશોરે સગીરા સાથે સબંધ બાંધતા ગર્ભવતી બની
ઇલોરાપાર્કની ખાનગી હોસ્પિટલમાં દાખલ થયેલી એક સગીરા ગર્ભવતી હોવાથી લક્ષ્મીપુરા પોલીસને જાણ કરવામાં આવી હતી.
લક્ષ્મીપુરાના પીઆઇ ગાયત્રી રાજપૂતે આ કેસની તપાસ કરાવી સગીરાનું કાઉન્સેલિંગ કરાવતાં મોસાળમાં રહેવા આવતા સગીરવયના એક કિશોરના સંપર્કમાં આવેલી સગીરા સાથે કિશોરે શારીરિક સબંધ બાંધ્યા હોવાની વિગતો ખૂલી હતી.
બંને જણા સોશ્યલ મીડિયાના માધ્યમથી પણ એકબીજાના સંપર્કમા રહેતા હતા.કિશોરે કેટલાક સમયથી અભ્યાસ પણ છોડી દીધો હોવાની વિગતો જાણવા મળી છે.જેથી લક્ષ્મીપુરા પોલીસે પીડિતાની ફરિયાદ નોંધી કિશોર સામે કાર્યવાહી કરી હતી.
