ખુલ્લી ગટરોના કારણે અકસ્માતનો ભય
પ્રાથમિક આરોગ્ય કેન્દ્રમાં સારવાર માટે આવતા દર્દીઓ અને સગાનું જ આરોગ્ય જોખમાય તેવી સ્થિતિ
નડિયાદ: સરકાર દ્વારા વિકાસ સપ્તાહની ઉજવણી કરવામાં આવી રહી છે. ત્યારે માતર તાલુકાના સંધાણા ગામના મુખ્ય રસ્તા ઉપર પ્રાથમિક આરોગ્ય કેન્દ્રની સામે ખુલ્લી ગટર અને ગંદકી, કચરાના ઢગલાં જોવા મળી રહ્યા છે. પરિણામે ગ્રામજનોને અવરજવર કરવામાં પારાવાર મુશ્કેલી વેઠવી પડે છે.
માતર તાલુકાના સંધાણા ગામમાં પ્રાથમિક આરોગ્ય કેન્દ્ર આગળથી નેશનલ હાઈવે અને ત્યાંથી ગામમાં પ્રવેશવાનો મુખ્ય રોડ પસાર થાય છે. પરિણામે રોડ ગ્રામજનો તેમજ વાહનોની અવરજવરથી ધમધમતો રહે છે. ત્યારે હાલમાં દૂધ મંડળી સુધી આરસીસી રોડ બનાવવામાં આવેલો છે. જ્યારે પ્રાથમિક આરોગ્ય કેન્દ્ર સામેથી પસાર થતો હાઇવે તરફ જતો રોડ અત્યંત બિસ્માર હાલતમાં છે.
ઉપરાંત પ્રાથમિક આરોગ્ય કેન્દ્ર આગળ ગંદકી અને કચરાના ઢગલાં ખડકાયેલા છે. જેથી આરોગ્ય કેન્દ્રમાં સારવાર માટે આવતા લોકોનું આરોગ્ય વધારે જોખમાય તેવી સ્થિતિ સર્જાય છે. રોડની અડીને પહોળી ખુલ્લી ગટરમાં અબાલ વૃદ્ધ કે પશુઓ પડી જવાનો ભય છે. ગામના પ્રવેશ દ્વારમાં જ આવી સ્થિતિ હોય તો ગામની અંદર કેવી સ્થિતિ હશે તેવા પ્રશ્નો લોકો કરી રહ્યા છે. ત્યારે સારવાર માટે આવતા દર્દીઓને પડતી હાલાકી નિવારવા યોગ્ય કાર્યવાહી કરવા માંગણી ઉઠી છે.
