– 2024 માં માહિતી માંગી ત્યારે ચીફ ઓફિસર સિદ્ધાંત પટેલ હતા
– હાલના ચીફ ઓફિસ આકાશ પટેલને દંડ ફટકારાતા તેઓનો ગુજરાત માહિતી આયોગમાં અપીલમાં જવાનો દાવો
બગોદરા : માહિતી અધિકાર હેઠળ સમયમર્યાદામાં માહિતી ન આપવા અને માહિતી આયોજના આદેશનું ઉલ્લંઘન કરવા બદલ બાવળા પાલિકાના ચીફ ઓફિસરને માહિતી કમિશનરે ૧૫ હજારનો દંડ ફટકાર્યો છે. અરજદારને ૧૦ દિવસમાં વિનામૂલ્યે માહિતી પૂરી પાડવાનો પણ આદેશ કર્યો છે.
?બાવળા નગરપાલિકાના તત્કાલીન ચીફ ઓફિસર સિદ્ધાર્થ પટેલ પાસે તા. ૧૧ સમ્પેમ્બર, ૨૦૨૪ના રોજ માહિતી અધિકાર કાયદા હેઠળ કેટલીક માહિતી બાવળાના અરજદારે માંગી હતી. જેમાં ૨૦૨૨-૨૩થી ૨૦૨૪ સુધીના તમામ ઠરાવોની પ્રમાણિત નકલ, તા. ૩૦ ઓગસ્ટ, ૨૦૨૪ના રોજ કલેક્ટર દ્વારા યોજાયેલી સંકલન મીટિંગમાં વરસાદી પાણીના નિકાલ અંગેની માહિતી અને આ વર્ષે વરસાદી પાણીના નિકાલ માટે નગરપાલિકા અને કોન્ટ્રાક્ટર દ્વારા થયેલા ખર્ચની વિગતોનો સમાવેશ થતો હતો.
ચીફ ઓફિસર દ્વારા નિયત સમયમર્યાદામાં માહિતી પૂરી પાડવામાં ના આવતા અરજદારે તા. ૩૦ ડિસેમ્બરે પ્રથમ અપીલ કરી હતી. પ્રથમ અપીલ અધિકારીએ જાહેર માહિતી અધિકારીને ૧૫ દિવસમાં વિનામૂલ્યે માહિતી પૂરી પાડવાનો હુકમ કર્યો હતો, પરંતુ આ હુકમનું પણ પાલન થયું ન હતું.
??અરજદારે તા. ૬ ફેબુ્રઆરીએ ગુજરાત માહિતી આયોગ ગાંધીનગર સમક્ષ બીજી અપીલ દાખલ કરી હતી. તા. ૩૧ જુલાઈના રોજ યોજાયેલી સુનાવણીમાં અરજદાર હાજર રહ્યા હતા, પરંતુ ચીફ ઓફિસર અને જાહેર માહિતી અધિકારી ગેરહાજર રહ્યા હતા. આયોગ દ્વારા ખુલાસો પૂછવા છતાં કોઈ સંતોષકારક જવાબ આપવામાં આવ્યો ન હતો. આથી, આયોગે માહિતી ન આપવાની બેદરકારી બદલ ચીફ ઓફિસર આકાશ પટેલને જવાબદાર ઠેરવીને ૧૫,૦૦૦નો દંડ ફટકાર્યો છે. દંડની રકમ ચીફ ઓફિસરે એક મહિનામાં પોતાના ભંડોળમાંથી ભરપાઈ કરવાની રહેશે અથવા તો તેમના પગારમાંથી કાપવામાં આવશે, તેવો આદેશ પણ કરવામાં આવ્યો છે. અરજદાર દ્વારા માગવામાં આવેલી તમામ માહિતી ૧૦ દિવસમાં વિનામૂલ્યે પૂરી પાડવાનો પણ આદેશ કરાયો છે. હાલના ચીફ ઓફિસર આકાશ પટેલે જણાવ્યું છે કે, મને દંડ થતા ગુજરાત માહિતી આયોજમાં અપીલમાં હું જઈશ તેમ જણાવ્યું છે.
