– એક જ દિવસમાં 82 પૈસાનો તીવ્ર કડાકા
– એક વર્ષમાં વિવિધ નવ કરન્સીઓ સામે રૂપિયામાં પચ્ચીસ ટકા સુધીનો કડાકો : પાઉન્ડ રૂ. 130 નજીક, યુરો વધી રૂ. 112 પાર
અમદાવાદ, મુંબઈ : વિદેશી હુંડિયામણ બજારમાં આજે રૂપિયા સામે ડોલરના ભાવમાં ઝડપી ઉછાળો આવતાં રૂપિયો ફરી ગબડયો હતો. શેરબજારમાં કડાકો બોલાતા તથા વિશ્વ બજારમાં અમેરિકા તથા ઈરાન વચ્ચે ફરી ઘર્ષણના સંકેતો વહેતાં થતાં તથા ક્રૂડતેલના ભાવ ઉંચકાતાં આજે રૂપિયા પર દબાણ વધતા ડોલર સામે રૂપિયો ઇન્ટ્રા-ડે પટકાઈને ૯૫.૩૪ના નવા તળિયે ઉતર્યો હતો જે અંતે ૯૫.૩૧ના મથાળે બંધ રહ્યો હતો.
રૂપિયા સામે ડોલરના ભાવ રૂ.૯૪.૪૮ વાળા આજે સવારે રૂ.૯૪.૮૮ ખુલ્યા પછી ઉંચામાં ભાવ રૂ.૯૫.૩૪ થઈ ૯૫.૩૧ રહ્યા હતા. રૂપિયા સામે ડોલરના ભાવ ૮૨ પૈસા ઉછળતાં ડોલર સામે રૂપિયો આજે ૦.૮૮ ટકા ગબડયો હતો.
વિશ્વ બજારમાં પણ આજે ડોલરનો વૈશ્વિક ઈન્ડેક્સ ઉંચકાયો હતો. જો કે વિશ્વ બજારમાં વિવિધ કરન્સીઓ સામે ડોલરના ભાવ વધ્યા હતા છતાં ડોલર સામે ચીનની કરન્સી મક્કમ હતી. ચીનમાંથી નિકાસ નોંધપાત્ર વધ્યાના અહેવાલ હતા. દરમિયાન, ગોલ્ડમેનના જણાવ્યા મુજબ ચીનની કરન્સી હજી ૨૦ ટકા અંડર વેલ્યુ રહી છે.
દરમિયાન, અમેરિકા પ્રમુખ તથા ચીનના પ્રમુખ વચ્ચે આ સપ્તાહમાં મળનારી મિટિંગ પર બજારના ખેલાડીઓની નજર રહી હતી. વિશ્વ બજારમાં ડોલરનો ગ્લોબલ ઈન્ડેક્સ આજે નીચામાં ૯૭.૯૨ તથા ઉંચામાં ૯૮.૧૫થી ૯૭.૯૮ રહ્યાના નિર્દેશો હતા.
મુંબઈ બજારમાં રૂપિયા સામે બ્રિટીશ પાઉન્ડના ભાવ આજે ૯૬ પૈસા ઉછળી ઉંચામાં ભાવ રૂ.૧૨૯.૬૫ થઈ રૂ.૧૨૯.૬૧ રહ્યા હતા. યુરોપીયન કરન્સી યુરોના ભાવ રૂપિયા સામે ૯૧ પૈસા વધી ઉંચામાં ભાવ રૂ.૧૧૨.૧૩ થઈ રૂ.૧૧૨.૧૧ રહ્યા હતા. રૂપિયા સામે જાપાનની કરન્સી આજે ૦.૪૬ ટકા ઉંચકાઈ હતી. ચીનની કરન્સી આજે રૂપિયા સામે ૦.૮૭ ટકા ઉછળી હતી.
ભારતમાં તાજેતરમાં બે સપ્તાહમાં ફોરેક્સ રિઝર્વમાં નોંધપાત્ર ઘટાડો થતાં તેની ઈમ્પેકટ પણ આજે રૂપિયા પર જોવા મળી હતી. ભારતનો રૂપિયો એક વર્ષમાં વિવિધ નવ મુખ્ય કરન્સીઓ સામે ૨૫ ટકા સુધી તૂટયો હોવાનું જાણકારો જણાવી રહ્યા હતા.
વિશ્વ બજારમાં આજે ક્રૂડતેલના ભાવ વધી ઉંચામાં બેરલના ૧૦૬ ડોલર નજીક પહોંચ્યા હતા. ડોલરના ભાવ સાંજે રૂ.૯૫.૩૧ રહ્યા હતા. દરમિયાન, રૂપિયો ગબડતાં તથા ડોલરના ભાવ ઝડપી ઉછળતાં દેશમાં આયાત થતી ક્રૂડ સહિતની વિવિધ ચીજોની ઈમ્પોર્ટ કોસ્ટ વધી જવાની તથા મોંઘવારી અને ફુગાવો વધવાની ભીતિ જાણકારો જણાવી રહ્યા હતા. રૂપિયા સામે સાંજે ડોલરના ભાવ ઉંચામાં રૂ.૯૫.૩૪ થઈ રૂ.૯૫.૩૧ રહ્યા હતા તથા બંધ ભાવના સંદર્ભમાં રૂપિયો નવા નીચા તળિયે ઉતરી ગયાનું બજારના જાણકારો જણાવી રહ્યા હતા. ડોલર સામે રૂપિયો આજે સાંજના ભાવ જોતાં ૮૨ પૈસા ગબડયો હતો.
ફોરેક્સ ભાવ
ડોલર રૂ. ૯૫.૩૧
પાઉન્ડ રૂ. ૧૨૯.૬૧
યુરો રૂ. ૧૧૨.૧૫
યેન રૂ. ૦.૬૧
