Rajkot News : રાજકોટના થોરાળા વિસ્તારની ‘શામજી મકા ગેંગ’ વિરુદ્ધ ક્રાઈમ બ્રાન્ચે સપાટો બોલાવ્યો છે. હત્યા, અપહરણ, દુષ્કર્મ સહિતના ગુના સાથે સંકળાયેલી ગેંગના 12 સાગરીતો વિરુદ્ધ પોલીસે ‘ગુજસીટોક’ (GUJCTOC) હેઠળ કડક ગુનો નોંધી જેલના સળિયા પાછળ ધકેલવાની તજવીજ હાથ ધરી છે. જેમાં 8 આરોપીની અટકાયત કરવામાં આવી છે, જ્યારે ફરાર 4 આરોપીને ઝડપી પાડવા ક્રાઈમ બ્રાન્ચે આગળની કાર્યવાહી તેજ કરી છે.
‘શામજી મકા ગેંગ’ વિરુદ્ધ ‘ગુજસીટોક’ હેઠળ કાર્યવાહી
પોલીસ તપાસમાં સામે આવ્યું છે કે, આ ટોળકીના શખસો છેલ્લા એક દાયકાથી થોરાળા અને આસપાસના વિસ્તારોમાં ગુનાહિત પ્રવૃત્તિને અંજામ આપતા હતા. આ ગેંગ સામે છેલ્લા 10 વર્ષમાં હત્યા અને હત્યાની કોશિશ, અપહરણ, દુષ્કર્મ, છેડતી અને રાયોટિંગ સહિતના ગુનો નોંધાયેલા છે.
વારંવાર જેલ હવાલે થયા છતાં આ શખસોની ગુનાહિત પ્રવૃત્તિઓ અટકતી નહોતી, જેના પગલે પોલીસે ગેંગના આરોપી સામે ગુજસીટોક હેઠળ કાર્યવાહી હાથ ધરી છે.
8 આરોપી ક્રાઈમ બ્રાન્ચના સકંજામાં, 4ની શોધખોળ જારી
ક્રાઈમ બ્રાન્ચે આ ગેંગના મુખ્ય સાગરીતો સહિત કુલ 8 આરોપીઓની અટકાયત કરી લીધી છે. જોકે, આ ટોળકીના અન્ય 4 સાગરીતો હજુ પણ પોલીસ પકડથી દૂર છે. ફરાર આરોપીઓને પકડવા માટે ક્રાઈમ બ્રાન્ચની અલગ-અલગ ટીમો દ્વારા તપાસના ચક્રો ગતિમાન કરવામાં આવ્યા છે.
આ પણ વાંચો: ISIS કનેક્શન અને ગઝવા-એ-હિંદ! ગુજરાત ATSએ બે આતંકવાદીઓ દબોચ્યા, પાકિસ્તાનથી મંગાવવાના હતા હથિયારો
ક્રાઈમ બ્રાન્ચના DCPએ શું કહ્યું?
રાજકોટ ક્રાઈમ બ્રાન્ચના DCPએ જણાવ્યું હતું કે, ‘રાજકોટ શહેરમાં વારંવાર ગંભીર ગુનાઓ આચરતી ગેંગ સામે કડક પગલા લેવામાં આવ્યા છે. શામજી મકા ગેંગ દ્વારા લૂંટ, હત્યા સહિતના 22 જેટલાં ગંભીર ગુનાઓ આચર્યા છે. જેને લઈને આ ગેંગના આરોપીઓ સામે કુલ 37 FIR નોંધાયેલી છે.’
અટકાયત કરેલા આરોપીના નામ
– દેવશીભાઈ મકાભાઈ મકવાણા
– દિલિપભાઈ પ્રેમજીભાઈ ચૌહાણ
– ચિરાગ શ્યામજીભાઈ મકવાણા
– કિરણ થીમસુરિયા
– અજય જાદવ
– ગૌતમ ઉર્ફે ગોગો બારૈયા
– નાગેશ ઉર્ફે લાલો શ્યામજીભાઈ મકવાણા
– મેહુલ કનુભાઈ સોલંકી
