અમદાવાદ : એશિયા પેસિફિક ક્ષેત્ર વૈશ્વિક રોકાણમાં પોતાનું વર્ચસ્વ જાળવી રહ્યું છે અને એકંદર મૂડી પ્રવાહમાં મહત્વપૂર્ણ ભૂમિકા ભજવી રહ્યું છે. ભારત આ ક્ષેત્રના મુખ્ય દેશોમાં પણ મહત્વપૂર્ણ ભૂમિકા ભજવી રહ્યું છે અને તે જમીન અને વિકાસ સ્થળો માટે ટોચના ૧૦ વૈશ્વિક ક્રોસ- બોર્ડર રોકાણ સ્થળોમાં અગ્રેસર રહે છે.
પ્રોપર્ટી એડવાઇઝરી ફર્મ કોલિયર્સ દ્વારા બહાર પાડવામાં આવેલા અહેવાલમાં, સિંગાપોર, જાપાન અને હોંગકોંગને પ્રથમ ક્વાર્ટરમાં વૈશ્વિક મૂડીના ટોચના ૧૦ સ્ત્રોતોમાં સામેલ કરવામાં આવ્યા હતા. જેમાં સિંગાપોર ચોથા, જાપાન સાતમા અને હોંગકોંગ દસમા ક્રમે છે. કાયમી સંપત્તિ માટે ટોચના ૧૦ વૈશ્વિક ક્રોસ-બોર્ડર મૂડી સ્થળોમાં જાપાન અને ઓસ્ટ્રેલિયાનો સમાવેશ થાય છે.
રિપોર્ટ મુજબ, એશિયા પેસિફિક જમીન અને વિકાસ સ્થળો માટે સૌથી આકર્ષક ક્ષેત્ર રહ્યું છે. તેના ટોચના ૧૦ બજારોમાંથી, ૭ એશિયા પેસિફિક ક્ષેત્રના છે.ચીન અને સિંગાપોર યાદીમાં ટોચ પર છે. તે પછી ઓસ્ટ્રેલિયા, મલેશિયા અને ભારત પાંચમાથી સાતમા સ્થાને છે.
હોંગકોંગ અને જાપાન નવમા અને દસમા સ્થાને છે. ચીને તમામ સરહદી પ્રવૃત્તિઓમાં ૮૦ ટકા હિસ્સા સાથે બજારમાં પોતાનું વર્ચસ્વ જાળવી રાખ્યું છે.
વૈશ્વિક સરહદી રોકાણમાં ભારતની ભૂમિકા પણ મહત્વપૂર્ણ છે. જમીન અને વિકાસ સ્થળો માટે ટોચના ૧૦ વૈશ્વિક ક્રોસ-બોર્ડર રોકાણ સ્થળોમાં ભારત ૭મા ક્રમે છે. ભારત એશિયા પેસિફિક ક્ષેત્રમાં રોકાણ સ્થળ તરીકે ઉભરી રહ્યું છે.
૨૦૨૫ ના પ્રથમ ત્રિમાસિક ગાળામાં ભારતીય રિયલ એસ્ટેટમાં સંસ્થાકીય રોકાણ ૧.૩ અબજ ડોલર રહ્યું હતું, જે ગયા વર્ષ કરતાં ૩૧ ટકા વધુ છે. જે આ ક્ષેત્રની મજબૂતાઈ અને રોકાણકારોના વિશ્વાસને દર્શાવે છે.
રેપો રેટમાં સતત ત્રીજા ઘટાડાથી દેશના રિયલ એસ્ટેટ ક્ષેત્રમાં વધુ રોકાણ આવી શકે છે. ૨૦૨૫ ના પ્રથમ ત્રિમાસિક ગાળામાં રિયલ એસ્ટેટમાં વિદેશી રોકાણકારોનો હિસ્સો લગભગ ૪૦ ટકા રહ્યો છે.
