મોરબી નજીક સિરામિક ફેક્ટરીના લેબર ક્વાર્ટરનો બનાવ
બન્ને વચ્ચે ઝઘડો થતાં યુવતીને લાકડી અને પટ્ટાથી અમાનુષી માર મારતા મોત, પોલીસ મથકમાં યુવાન પણ ઢળી પડયો
મોરબી: મોરબીના લખધીરપુર રોડ પર સિરામિક ફેક્ટરીના લેબર ક્વાર્ટરમાં લીવ ઇન રીલેશનશીપમાં રહેતા યુવતી અને યુવક વચ્ચે ઝઘડો થયા બાદ યુવકે ઢોર માર મારતા યુવતીનું મોત થયું હતું. બનાવ અંગે પૂછપરછ કરવા પોલીસ મથકે યુવાનને લઇ આવ્યા બાદ તબિયત બગડતા હોસ્પિટલ લઇ ગયા હતાં. જ્યાં તેને પણ મૃત જાહેર કરાયો હતો. જેથી પોલીસે યુવતીની હત્યા અને યુવકના શંકાસ્પદ મોત અંગે તપાસ હાથ ધરી હતી.
મોરબી તાલુકા પોલીસ મથકના પીએસઆઈ હરેશકુમાર તિવારીએ આરોપી નરેન્દ્રસિંઘ કમલસિંહ ધુ્રવેલ (રહે. હાલ લેક્સેસ સિરામિક લેબર કોલોની, મૂળ મધ્યપ્રદેશ) વિરૂધ્ધ ફરિયાદ નોંધાવી છે કે લખધીરપુર ગામના ઝાપા સામે આવેલ લેક્સેસ સિરામિક કંપનીમાં એક મહિલાનો મૃતદેહ હોવાની માહિતી મળતાં ટીમ દોડી ગઇ હતી. જ્યાં લેબર ક્વાર્ટરના રૂમમાં મહિલાનો મૃતદેહ મળી આવ્યો હતો. શરીર પર માર માર્યાના નિશાન હતાં. જેથી હત્યાનો બનાવ પ્રાથમિક દ્રષ્ટિએ જણાઇ આવતાં મૃતદેહ પીએમ અર્થે હોસ્પિટલ ખસેડાયો હતો. મૃતકનું નામ પુષ્પાબેન ગંભીરસિંહ મરાવી (ઉ.વ.૨૦, રહે. મધ્યપ્રદેશ) હોવાનું જાણવા મળ્યું હતું.
મૃતક પુષ્પાબેન લીવ ઇન રિલેશનશીપમાં નરેન્દ્રસિંહ કમલસિંહ ધુ્રવેલ સાથે રહેતા હતાં. સ્થળ પર પ્રાથમિક કડક રીતે પૂછપરછ કરતાં આરોપી ભાંગી પડયો હતો અને જણાવ્યું હતું કે પુષ્પાને પ્રેમ કરતો હતો. બંને પરિવારની મંજૂરીથી છેલ્લા ત્રણ માસથી લઇને આવી લીવ ઇન રિલેશનશીપમાં રહેતો હતો. છેલ્લા ઘણાં દિવસથી પોતાને પુષ્પા જોડે મનદુઃખ થતાં ગઇકાલે સાંજે આઠ વાગ્યા દરમિયાન ઝઘડો ઉગ્ર થતા લાકડી અને પટ્ટાથી માર માર્યો હતો અને બેભાન થઇ જતા રૂમમાં મૂકી બહાર ગયો અને રાત્રે પરત આવતા તે ભાનમાં નહીં આવતા અને ઠંડી થઇ જતા કોઇ જવાબ આપતી ન હતી, જેથી કંપનીના સુપરવાઇઝરને બનાવ અંગે જાણ કરતાં પોલીસને બોલાવી હતી.
બીજી તરફ હત્યાના આરોપી નરેન્દ્રસિંહે પોલીસ સમક્ષ હત્યાની કબૂલાત આપી હતી અને પૂછપરછ માટે પોલીસ મથકે લઇ જવામાં આવ્યો હતો. જ્યાં યુવાનની તબિયત બગડતા સરકારી હોસ્પિટલ સારવાર માટે લઇ ગયા હતા અને ફરજ પરના તબીબે જોઇ તપાસીને યુવાનને મૃત જાહેર કર્યો હતો. તેવી અપમૃત્યુના બનાવની નોંધ મોરબી તાલુકા પોલીસ મથકમાં કરવામાં આવી છે.
