– સુપ્રીમ કોર્ટનો સાઇબર ક્રાઇમના કેસોમાં મહત્ત્વનો ચુકાદો
– રિઝર્વ બેન્કને ફ્રોડસ્ટરોને પકડવા માટે આર્ટિફિશિયલ ઇન્ટેલિજન્સ અને મશીન લર્નિંગનો ઉપયોગ કરવા તાકીદ
– સીબીઆઈ ફ્રોડ કેસોમાં બેન્કોની ભૂમિકાની પણ તપાસ કરે : સુપ્રીમ કોર્ટ
નવી દિલ્હી : સુપ્રીમ કોર્ટે સોમવારે સીબીઆઈને જણાવ્યું હતું કે ડિજિટલ એરેસ્ટના કેસોમાં બધી જ જુદી-જુદી તપાસ કરવાના બદલે આખા ભારતને સાંકળી સંયુક્ત તપાસ હાથ ધરે. તેની સાથે સુપ્રીમ કોર્ટે રિઝર્વ બેન્કને પણ સવાલ પૂછ્યો હતો કે તે શા માટે સાઇબર ક્રિમિનલ્સ દ્વારા ઉપયોગમાં લેવાતા ફ્રીઝ એકાઉન્ટને શોધી કાઢવા આર્ટિફિશિયલ ઇન્ટેલિજન્સનો ઉપયોગ કરતી નથી.
સાઇબર ક્રાઇમના ડિજિટલ એરેસ્ટના ફોર્મેટમાં જબરદસ્ત વધારો નોંધાયો છે. તેમા છેતરપિંડી આચરનારાઓ કોર્ટના અધિકારી કે સરકારી એજન્સીના અધિકારી તરીકે ઓનલાઇન પરિચય આપીને ઓડિયો અને વિડીયો કોલ દ્વારા પીડિતને ડિજિટલ એરેસ્ટ કરે છે. તેઓ પીડિતને બંદી બનાવી લે છે અને તેને નાણા ચૂકવવાની ફરજ પાડે છે.
ભારતના મુખ્ય ન્યાયાધીશ સૂર્યકાંત અને ન્યાયાધીશ જોયમાલા બાગચીની બેન્ચે વિપક્ષ શાસિત પશ્ચિમ બંગાળ, તમિલનાડુ, કર્ણાટક અને તેલંગણા સહિતના રાજ્યોને જણાવ્યું હતું કે તેઓ તેમના અધિકાર ક્ષેત્રમાં ડિજિટલ એરેસ્ટને લગતા કેસોની તપાસ કરવા માટે સીબીઆઈ સાથે કરાર કરી લે. હરિયાણાના વૃદ્ધ દંપતીએ કરેલી અરજીના સંદર્ભમાં સુપ્રીમ કોર્ટે સ્વસંજ્ઞાાન લઈને આ પ્રકારના દિશાનિર્દેશો પાઠવતા જણાવ્યું હતું કે સાઇબર ક્રિમિનલો મુખ્યત્વે સિનિયર સિટિઝન્સને જ લક્ષ્યાંક બનાવે છે. તેમની આખી જિંદગીની મહેનતના નાણા ઉસેટી જાય છે અને તેમને મરવાના વાંકે છોડી દે છે. તેમણે આ માટે આઇટી ઇન્ટરમીડિયરીઝને વિગતો પૂરી પાડવા અને ડિજિટલ એરેસ્ટના કેસમાં સીબીઆઈને સહયોગ આપવા જણાવ્યું હતું. બેન્ચે આ ઉપરાંત સીબીઆઈને આદેશ આપ્યો હતો કે જો ડિજિટલ એરેસ્ટના કેસમાં ગુનેગાર વિદેશથી ઓપરેટ કરતો હોય તો ઇન્ટરપોલની મદદ લેવામાં આવે. ટેલિકોમ વિભાગ પણ તે સુનિશ્ચિત કરે કે ટેલિકોમ કંપનીઓ એક જ યુઝરને અનેક કાર્ડ ન આપે, જેથી સાઇબર ફ્રોડની સંભાવનામાં વધારો થાય. આ પ્રકારના ઓનલાઇન ગુનાની સાથે ડીલ કરવા બધા રાજ્યો અને કેન્દ્રશાસિત પ્રદેશોને પ્રાદેશિક અને સ્ટેટ ક્રાઇમ કોઓર્ડિનેશન સેન્ટર સ્થાપવા જણાવ્યું હતું જે સીબીઆઈ સાથે સંકલન સાધે.
