Surat Corporation Budget : સુરત મ્યુનિ. કમિશ્નર તરીકે થોડા દિવસ પહેલાં જ નિયુક્ત થયેલા એમ. નાગરાજને પાલિકાના સાયન્સ સેન્ટર ખાતે આજે તેમનું પહેલું બજેટ રજુ કર્યું હતું. સુરત પાલિકાનું ડ્રાફ્ટ બજેટ ગત વર્ષની જેમ 10 હજાર કરોડને પાર કરી ગયું છે. આ વર્ષે જાહેર થયેલા ડ્રાફ્ટ બજેટ 10593 કરોડનું ડ્રાફ્ટ બજેટ રજૂ કર્યું તેમાં 5073 કરોડ કેપિટલ કામો રજૂ કરવામાં આવ્યા છે. આગામી વર્ષ સુરત પાલિકાની ચૂંટણીનું હોય સુરતીઓ પર કોઈ જાતના વેરા વધારવામાં આવ્યા નથી. આ બજેટમાં 8 ફલાયઓવર બ્રીજ, 2 રેલવે ઓવર બ્રીજ, 2 રીવર બ્રિજ અને 7 ખાડી બ્રિજનું આયોજન કરવામાં આવ્યું છે.
પાલિકામાં નવ નિયુક્ત થયેલા મ્યુનિ. કમિશ્નર એમ નાગરાજને તેમનું પહેલું બજેટ રજૂ કર્યું છે તે પણ પાલિકાના ઈતિહાસનું સૌથી મોટું બજેટ છે. ગત વર્ષે મ્યુનિ. કમિશનર શાલિની અગ્રવાલે 9603 કરોડનું બજેટ રજૂ કર્યું હતું. જેમાં 990 કરોડના વધારા સાથે 10593 કરોડનું બજેટ જાહેર કર્યું છે. ગત વર્ષે ડ્રાફ્ટ બજેટમાં કેપીટલ કામ માટે 4562 કરોડની જોગવાઈ કરવામાં આવી હતી. જેમાં પણ મ્યુનિ. કમિશ્નરે 511 કરોડનો વધારો કર્યો છે અને ડ્રાફ્ટ બજેટમાં કેપીટલ કામ માટે 5073 કરોડની જોગવાઈ કરવામાં આવી છે.
આગામી ગણતરીના મહિનામાં સુરત પાલિકાની ચૂંટણી છે તેની ઈફેક્ટ સીધી બજેટ પર જોવા મળી રહી છે. મ્યુનિ. કમિશ્નરે પણ આ બજેટમાં કર દરમાં કોઈ વધારો સુચવ્યો નથી. અને 257 કરોડની રેવન્યુ સરપ્લસ ધરાવતું આ બજેટ રજુ કર્યું છે. બજેટ રજુ કરતા એમ. નાગરાજને જણાવ્યું હતું કે, સુરત શહેરને વર્લ્ડ ક્લાસ સિટી બનાવવા પર તેઓએ ભાર મુકતા વિવિધ તબક્કા વાર આયોજન કરવામાં આવ્યું છે. આગામી દિવસોમાં સુરતને સ્લમ ફ્રી સિટી, ડસ્ટ ફ્રી સીટીની સાથે-સાથે ચાઈલ્ડ અને વુમન ફ્રેન્ડલી સિટી બનાવવા માટે કામગીરી કરવામાં આવશે.
આ ઉપરાંત સુરતને વિવિધ પ્રકારના ટુરિઝમ સાથે સાંકળીને ટુરીઝમ સીટી બનાવવા માટે પણ આયોજન કરાયું છે જેમાં શન ટુરીઝમ, ઈન્ડસ્ટ્રી ટુરિઝમ અને ટ્રેડ-એડવેન્ચર ટુરીઝમ તકીતે સુરત જાણીતું બનશે અને સખી મંડળની બહેનોને ટુરિઝમ ગાઈડ બની શકે તે માટે તેમને તાલીમ પણ આપવામાં આવશે. બેરેજ પ્રોજેક્ટ માટે ગત વર્ષે 150 કરોડ રૂપિયા ખર્ચનું આયોજન કરવામાં આવ્યું હતું જ્યારે આગામી વર્ષ 2026-27નાં ડ્રાફ્ટ બજેટ માં 350 કરોડ રૂપિયાની ફાળવણી કરવામાં આવી છે.
સુરત મહાનગર પાલિકાની કુલ એનર્જી જરૂરિયાત સામે 100 ટકા રિન્યુએબલ એનર્જીનો લક્ષ્યાંક પુર્ણ કરવા માટે અને વીજ બચત માટે 2030 સુધીના રોડ મેપ સાકાર થાય તે માટે પણ બજેટમાં જોગવાઈ કરવામાં આવી છે. શહેરની ટ્રાફિક સમસ્યામાં ઘટાડો કરવા માટે આ બજેટમાં 8 ફલાયઓવર બ્રીજ, 2 રેલવે ઓવર બ્રીજ, 2 રીવર બ્રિજ અને 7 ખાડી બ્રિજનું આયોજન કરવામાં આવ્યું છે. આ સાથે સાથે સુરતમાં આવતા ખાડી પૂરથી લોકોને બચાવવા માટે 61 કોડની જોગવાઈ કરવામાં આવી છે અને તેના માટે 61 કરોડ રૂપિયાના ખર્ચે ખાડીના રીમોડલીંગ અને રિસ્ટ્રક્ચરીંગનાં કામ માટે બજેટમાં જોગવાઈ કરવામાં આવી છે.
