મુંબઈ : મુંબઈ ઝવેરી બજારમાં આજે સોના-ચાંદીના ભાવમાં ઉછાળા ઉભરા જેવા નિવડતાં ભાવમાં ફરી ઘટાડો જોવા મળ્યો હતો. નવી માગ ધીમી હતી. કરન્સી બજારમાં રૂપિયા સામે ડોલરના ભાવ વધતા અટકી ઘટાડા પર રહેતાં ઝવેરી બજારમાં તેની અસર ભાવ પર નેગેટીવ દેખાઈ હતી. વિશ્વ બજારના સમાચાર કિંમતી ધાતુઓમાં પ્રોત્સાહક રહ્યા હતા.
દરમિયાન, અમદાવાદ ઝવેરી બજારમાં આજે સોનાના ભાવ ૧૦ ગ્રામના રૂ.૪૦૦ ઘટયા હતા જ્યારે અમદાવાદ ચાંદીના ભાવ કિલોના રૂ.૧૦૦૦ તૂટયા હતા. વિશ્વ બજારમાં જો કે સોનાના ભાવ ઔંશદીઠ ૪૦૬૫થી ૪૦૬૬ વાળા નીચામાં ભાવ ૪૦૪૦ થયા પછી ઉંચામાં ભાવ ૪૦૭૭ થઈ ૪૦૭૦થી ૪૦૭૧ ડોલર રહ્યાના નિર્દેશો હતા.
અમદાવાદ ઝવેરી બજારમાં આજે સોનાના ભાવ ઘટી ૯૯૫ના રૂ.૧૨૬૮૦૦ તથા ૯૯૯ના રૂ.૧૨૭૧૦૦ રહ્યા હતા જયારે અમદાવાદ ચાંદીના ભાવ ઘટી રૂ.૧૫૬૦૦૦ રહ્યા હતા. દરમિયાન, વિશ્વ બજારમાં ચાંદીના ભાવ ઔંશના ૫૦.૦૨ વાળા નીચામાં ૪૯.૭૧ તથા ઉંચામાં ભાવ ૫૦.૩૯ થઈ ૫૦.૦૮થી ૫૦.૦૯ ડોલર રહ્યા હતા.
મુંબઈ બુલિયન બજારમાં આજે સોનાના ભાવ જીએસટી વગર ૯૯૫ના રૂ.૧૨૩૨૦૦ વાળા રૂ.૧૨૨૫૬૪ થઈ રૂ.૧૨૨૮૧૪ રહ્યા હતા જ્યારે ૯૯૯ના ભાવ રૂ.૧૨૩૭૦૦ વાળા રૂ.૧૨૩૦૫૭ થઈ ૧૨૩૩૦૮ બંધ રહ્યા હતા. મુંબઈ ચાંદીના ભાવ જીએસટી વગર રૂ.૧૫૩૮૦૦ વાળા રૂ.૧૫૩૦૫૪ થઈ રૂ.૧૫૩૬૫૦ રહ્યા હતા.
વિશ્વ બજારમાં પ્લેટીનમના ભાવ ૧૫૨૫ ડોલર રહ્યા હતા. પેલેડીયમના ભાવ ઔંશદીઠ ૧૩૭૯ ડોલર રહ્યા હતા. વિશ્વ બજારમાં ડોલર ઈન્ડેક્સ ઘટતાં વૈશ્વિક સોનામાં ઘટાડે ફંડોનું ફરી બાઈંગ જોવા મળ્યું હતું.
દરમિયાન, વિશ્વ બજારમાં ક્રૂડતેલના ભાવ પણ ઘટયા પછી ફરી વધી આવ્યા હતા. બ્રેન્ટક્રૂડના ભાવ બેરલના નીચામાં ૬૧.૯૪ તથા ઉંચામાં ભાવ ૬૨.૭૯ થઈ ૬૨.૪૯ ડોલર રહ્યા હતા. યુએસ ક્રૂડના ભાવ નીચામાં ૫૭.૪૨ તથા ઉંચામાં ભાવ ૫૮.૬૬ થઈ ૫૭.૯૭ ડોલર રહ્યા હતા. મુંબઈ બુલિયન બજારમાં જીએસટી વગર પ્લેટીનમના ભાવ ૧૦ ગ્રામના રૂ.૪૮૧૩૯ ખુલી છેલ્લે બંધ ભાવ રૂ.૪૭૭૦૪ રહ્યા હતા.
