જુદી-જુદી 80 કોલેજના 1500 યુવા કલાકારો 33 સ્પર્ધામાં ભાગ લેશે : કાનજી ભુટા રંગમંચ ઉપરાંત આર્ટ ગેલેરી, સંસ્કૃત, ગુજરાતી, ફિઝિકસ અને એમસીએ ભવનમાં સ્પર્ધાઓ : દરરોજ સાંજે પરિણામ છેલ્લા દિવસે ઈનામ વિતરણ
રાજકોટ, : સૌરાષ્ટ્ર યુનિ.ના આંગણે આગામી તા. 13થી તા. 15 ઓકટોબર દરમિયાન આયોજિત 53મા યુવક મહોત્સવમાં રાજકોટ સહિત સૌરાષ્ટ્રના જુદા-જુદા જિલ્લાની 80 કોલેજનાં 1500 સ્પર્ધકો જુદી-જુદી 33 સ્પર્ધામાં ભાગ લેશે. ત્રણ દિવસના યુવક મહોત્સવનું નામ સિંદુરોત્સવ રાખવામાં આવ્યું છે. યુવક મહોત્સવમાં સાંસ્કૃતિક વિભાગની તમામ કૃતિઓ કાનજી ભુટા રંગમંચ ઉપર ભજવવામાં આવશે.
સૌરાષ્ટ્ર યુનિ. દ્વારા વિદ્યાર્થીઓમાં કલા, સંસ્કૃતિ અને સાહિત્ય પ્રત્યેનું કૌશલ્ય ઉજાગર થાય તે માટે યુવક મહોત્સવનું આયોજન કરવામાં આવે છે. આ વર્ષે તા. 13 થી તા. 15 ઓકટોબર દરમિયાન આયોજિત યુવક મહોત્સવનું ઉદ્દઘાટન તા. 13ના સવારે 11 કલાકે કાનજી ભુટા બારોટ રંગમંચ ખાતે કરવામાં આવશે. જુદા-જુદા 7 ભવનોમાં યુવક મહોત્સવની જુદી-જુદી સ્પર્ધાઓ યોજવામાં આવી છે. કોલેજો અને ભવનોમાં તા. 16 ઓકટોબરના શૈક્ષણિક સત્રનો અંતિમ દિવસ છે. તા. 17 ઓકટોબરથી દિવાળી વેકેશન શરૂ થતુ હોવાથી યુવક મહોત્સવની પૂર્ણાહૂતિ બાદ કોલેજો અને ભવનોમાં 21 દિવસનું વેકેશન રહેશે. આ વખતે યુવક મહોત્સવની જુદી-જુદી સ્પર્ધાઓના વિજેતાઓને ઈનામો આપવા માટેનાં સમારોહનું આયોજન પણ તા. 15ના અંતિમ દિવસે કરવામાં આવ્યું છે. જેમાં દરેક સ્પર્ધાનાં વિજેતાઓને રોકડ પુરસ્કાર, પ્રમાણપત્ર, મોમેન્ટો આપી સન્માનિત કરવામાં આવશે.
યુવક મહોત્સવના આયોજન સંદર્ભે સૂત્રોએ જણાવ્યું હતું કે તા. 13ના ઉદ્દઘાટન બાદ બપોરે 2 વાગ્યાથી યુવક મહોત્સવની સ્પર્ધાઓ શરૂ થશે. દરરોજ સાંજે જુદી-જુદી સ્પર્ધાઓના પરિણામો જાહેર કરી દેવામાં આવશે. યુનિ. કેમ્પસ ઉપર આવેલા જુદા-જુદા ભવનોના અડધો ડઝન સેમિનાર હોલ પૈકી મેઈન બિલ્ડિંગમાં આવેલા સેનેટ હોલ સાથે 4 સેમિનાર હોલ રીપેરીંગમાં હોવાથી સ્પર્ધાઓ જુદા-જુદા ભવનોના કલાસરૂમ ઉપરાંત અંગ્રેજી અને આંકડાશાસ્ત્ર ભવનના સેમિનાર હોલમાં યોજવામાં આવશે.
