રાજકોટમાં ઈ. 1935માં સ્ટેડિયમની સ્થાપના ઈ. 2006 સુધી સ્ટેડિયમ ક્રિકેટ મેચથી ધમધમતું : હાલ મનપા દ્વારા દર વર્ષે આતશબાજી, હવે કોઈ પણ કાર્યક્રમ યોજવા ભાડે અપાશે અનુકૂળ બેઠક વ્યવસ્થાની સાથે દાંડિયારાસ માટે રોજ 2 લાખ લેખે કૂલ 15 દિવસના રૂ. 30 લાખ અપસેટ કિંમત નક્કી કરાઈ
રાજકોટ, : રાજકોટમાં ઈ.સ. 1935માં રાજાશાહી વખતમાં સ્થપાયેલા રેસકોર્સ ક્રિકેટ સ્ટેડિયમ (જે પહેલા માત્ર સ્ટેડિયમ હતું) એક સદીથી અનેક સાંસ્કૃતિક પ્રવૃતિનું કેન્દ્ર રહેલું છે. 90 વર્ષ જુના આ ક્રિકેટ મેદાનને હવે મહાપાલિકા દ્વારા દાંડિયારાસ તથા ખાનગી ક્રિકેટ મેચથી માંડીને અન્ય પ્રસંગો માટે ભાડે આપશે જે માટે આવતીકાલે મળનારી સ્થાયી સમિતિમાં દરખાસ્તકરાઈ છે.
ઈ.સ. 2006 સુધી આ ક્રિકેટ સ્ટેડિયમમાં અનેક દેશો વચ્ચે આંતરરાષ્ટ્રીય ક્રિકેટ મેચો યોજાતી રહી છે. બાદમાં આ ક્રિકેટ સ્ટેડિયમ ટૂંકુ પડતા ખંઢેરી પાસે નવું ક્રિકેટ સ્ટેડિયમ બંધાતા આ પેવેલેયન ,રીફ્રેશ રૂમ ઉપરાંત જિમ, ગાર્ડન, સ્વીમીંગ પૂલ વગેરે નજીકમાં ધરાવતું ગ્રાઉન્ડ માત્ર સ્થાનિક રમતો અને કાર્યક્રમો માટે રહી ગયું છે. મહાપાલિકા દર વર્ષે ધનતેરસના દિવસે આ મેદાન પર આતશબાજી યોજે છે તો સભા,પતંગ મહોત્સવ જેવા કાર્યક્રમો પણ યોજાતા રહ્યા છે.
હવે રોજ 5થી 10,000 રૂ.ના ભાડા સાથે તેને સિઝન અને ટેનીસ બોલ ક્રિકેટ રમવા કે મેચ યોજવા ભાડે આપવા સાથે નવરાત્રિ સિવાયના કોઈ પણ કાર્યક્રમ યોજવા રોજ રૂ. 5 લાખના ભાડાથી આપવા સ્થાયી સમિતિ નિર્ણય લેશે તો બીજી તરફ તેને નવરાત્રિના આધુનિક દાંડિયારાસ યોજવા માટે રોજના રૂ. 2 લાખ લેખે 15 દિવસના રૂ. 30 લાખની ન્યુનત્તમ અપસેટ કિંમત સાથે ભાડે આપવા પણ કાર્યવાહી હાથ ધરાઈ છે.
