મુંબઈ : ડોલરમાં મજબૂતાઈને પગલે વિશ્વ બજારમાં સોનાચાંદીમાં માગ નીચી રહેતા ભાવમાં નરમાઈ જોવા મળી હતી. જેકસન હોલ સિમ્પોસિયમ ખાતે ફેડરલ રિઝર્વના ચેરમેન જેરોમ પોવેલનું શું નિવેદન આવે છે તેના પર બજારની નજર રહેલી છે. યુક્રેન-રશિયા યુદ્ધ બાબતે રોજેરોજ વિરોધાભાસી અહેવાલોને બજાર ડિસ્કાઉન્ટ કરી રહ્યું છે. ઈરાનના ઓઈલ વેપાર પર અમેરિકાના નવેસરથી પ્રતિબંધને કારણે ક્રુડ તેલમાં સુધારો જોવા મળ્યો હતો.
ઘરઆંગણે મુંબઈ ઝવેરી બજારમાં ૯૯.૯૦ દસ ગ્રામ સોનાના જીએસટી વગરના ભાવ સાધારણ વધી રૂપિયા ૯૯૩૫૮ મુકાતા હતા. જીએસટી સાથે ભાવ ત્રણ ટકા ઊંચા મુકાતા હતા. ૯૯.૫૦ દસ ગ્રામ સોનાના ભાવ રૂપિયા ૯૮૯૬૦ બોલાતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગર રૂપિયા ૧૧૩૯૦૬ મુકાતા હતા.
અમદાવાદ બજારમાં ૯૯.૯૦ દસ ગ્રામ સોનાના ભાવ રૂપિયા ૧૦૨૪૦૦ જ્યારે ૯૯.૫૦ સોનાના પ્રતિ દસ ગ્રામના ભાવ રૂપિયા ૧૦૨૧૦૦ મુકાતા હતા. ચાંદી .૯૯૯ એક કિલોના ભાવ રૂપિયા ૧૧૫૦૦૦ કવોટ થતા હતા.
વિશ્વ બજારમાં ડોલરની મજબૂતાઈ વચ્ચે કિંમતી ધાતુની સેફ હેવન માગ ધીમી પડી હતી. ફન્ડ હાઉસો સોનામાંથી નીકળી ડોલર તરફ વળ્યા હોવાના અહેવાલ હતા.
સોનુ પ્રતિ ઓંસ ૩૩૨૮ ડોલર જ્યારે ચાંદી ઔંસ દીઠ ૩૭.૮૮ ડોલર મુકાતી હતી. અન્ય કિંમતી ધાતુ પ્લેટિનમ ૧૩૪૦ ડોલર જ્યારે પેલેડિયમ પ્રતિ ઔંસ ૧૧૨૬ ડોલર મુકાતું હતું. જેકસન હોલ સિમ્પોસિયમ ખાતે ફેડરલ રિઝર્વના ચેરમેન જેરોમ પોવેલના નિવેદન પર બજારની નજર રહેલી છે. અમેરિકામાં વ્યાજ દર બાબતે સંકેત મળવાની અપેક્ષા છે.
ગ્રીકના નાગરિકની માલિકીની કંપનીઓ તથા ઈરાનના એક ડઝન જેટલા વેસલ્સ અને ચીનના બે ક્રુડ ઓઈલ ટર્મિનલ અને સ્ટોરેજ ઓપરેટરો પર અમેરિકાએ પ્રતિબંધ મૂકયાના અહેવાલે ક્રુડ ઓઈલમાં સપ્તાહ અંતે સુધારો જોવા મળ્યો હતો. નાયમેકસ ડબ્લ્યુટીઆઈ પ્રતિ બેરલ ૬૩.૫૯ ડોલર જ્યારે આઈસીઈ બ્રેન્ટ ક્રુડ ઓઈલ બેરલ દીઠ ૬૭.૬૫ ડોલર મુકાતુ હતું.
