દોઢેક વર્ષ પહેલા સોશિયલ મીડિયા પર થયો સંપર્ક હતો : રિસામણે રહેલી પરિણીતાને પતિ સાથે છૂટાછેડા આપી દેવા કહી લગ્ન ન કર્યા અને કોઈને કહીશ તો મારી નાખવા ધમકી આપી
જૂનાગઢ, : જૂનાગઢના એક શખ્સે રિસામણે રહેલી એક પરિણીતા સાથે મિત્રતા કેળવી હોટલમાં લઇ જઇ દુષ્કર્મ આચર્યું હતું. બાદમાં પરિણિતાના નામે લોન અને દાગીના લઈ લીધા હતા અને લગ્ન કરવા લાલચ આપી હતી, પણ બાદમાં લગ્ન ન કરી મારી નાખવા ધમકી આપી હતી. આ અંગે પોલીસ ફરિયાદ થઈ છે.
આ અંગેની વધુ વિગત મુળ ઉપલેટાની અને હાલ વેરાવળ રહેતી એક મહિલાના 2022માં લગ્ન થયા હતા. પતિ સાથે મનમેળ ન થતા તે રિસામણે આવી ગઈ હતી. દોઢેક વર્ષ પહેલા રાજકોટ ખાનગી બેંકમાં નોકરી કરતી ત્યારે જૂનાગઢના વસીમ સાદીક નાગોરા સાથે સોશ્યલ મીડિયા પર સંપર્ક થયો હતો. વસીમે મિત્રતા કેળવી આ મહિલાને જૂનાગઢની હોટલમાં બોલાવી હતી, ત્યાં દુષ્કર્મ આચર્યું હતું. ત્યારબાદ મહિલાને 1.70 લાખ રૂપિયાની વ્યવસ્થા કરી આપ નહીતર તારા પતિને તું હોટલમાં મળી હતી તે કહી દઈશ એમ કહ્યું હતું. આથી મહિલાએ તેના નામની 1.70 લાખની લોન કરાવી દીધી હતી. બાદમાં એક આઈફોન લઈ દીધો હતો.
આ ઘટના બાદ પણ મહિલાએ 11,000, 20,000, 8,000ની ખાનગી બેંકમાંથી લોન કરાવી દીધી હતી. ફરી ફાઈનાન્સ પર એક મોબાઈલ લઈ દીધો હતો. 50,000 રૂપીયા આંગડીયામાં ટ્રાન્સફર કર્યા હતા. 74,000 અલગ-અલગ સમયે ઓનલાઈન ટ્રાન્સફર કર્યા હતા. પછી આરોપીએ રાજકોટ ખાતે પણ હોટલમાં લઈ જઈ દુષ્કર્મ આચર્યું હતું. વસીમે મહિલાને તેના પતિ સાથે છુટાછેડા લઈ લેવા અને પોતા સાથે લગ્ન કરવાની વાત કરી હતી પરંતુ લગ્ન કર્યા ન હતા. મહિલાએ પૈસા તથા દાગીના પરત માંગતા વસીમે ઉશ્કેરાઈ જઈ ગાળો આપી ફરિયાદ કરીશ તો મારી નાખીશ એવી ધમકી આપી હતી. આ અંગે ગઈકાલે મહિલાએ ફરિયાદ કરતા બી ડિવિઝન પોલીસે વસીમ સાદીક નાગોરા સામે ગુનો નોંધી વધુ કાર્યવાહી હાથ ધરી છે.
