– મંગળવાર સુધીમાં નિર્ણય નહી લેવાય તો આંદોલનની ચિમકી
– ફાયર સેફ્ટી, સુરક્ષા, સફાઇ સહિત રીએસએસમેન્ટમાં વિષય સંખ્યા વધારવા અંગે રજૂઆત
ભાવનગર : મ.કૃ.ભાવનગર યુનિવર્સિટીમાં માળખાગત સુવિધા અને વિદ્યાર્થી હિતના પ્રશ્નોનો ઉકેલ લાવવા અખિલ ભારતીય વિદ્યાર્થી પરિષદ દ્વારા આજે વી.સી. સમક્ષ મોટી સંખ્યામાં રજૂઆતો કરી સુરક્ષા, ફાયર સેફ્ટી, સાફ સફાઇ તેમજ રીએસએસમેન્ટમાં વિષય સંખ્યા વધારવા સહિતની માંગણીઓ કરાઇ હતી. જો કે, યુનિ. કક્ષાએ પણ આ બાબતોને લઇ હકારાત્મક અભિગમ અપનાવ્યો હતો.
ઘણા લાંબા સમયથી યુનિવર્સિટીની વિવિધ માળખાગત સુવિધાઓ અને વિદ્યાર્થીઓના અભ્યાસને લગતી સમસ્યાઓને લઇ અનેક આવેદન અપાયા હતા જેમાં યુનિવર્સિટી કોઇ નિર્ણય ન લેતા આજે અખિલ ભારતીય વિદ્યાર્થી પરિષદના ૧૦૦ જેટલા કાર્યકર્તાઓએ ત્રણ કલાક સુધી યુનિવર્સિટીના વાઇસ ચાન્સેલર સાથે દલીલ કરી યુનિવર્સિટી કેમ્પસમાં વિવિધ જગ્યાઓએ ફાયર સેફ્ટીને લગતી તકેદારી રાખવા, કેમ્પસ તથા કોલેજોમાં સિક્યુરિટી ગાર્ડ વધારવા, તો એમ.એ. એક્સટર્નલ ઇંગ્લિશ ડિપાર્ટમેન્ટમાં બેથી વધુ પેપરો રિએસેસમેન્ટ કરાવી શકાતો ન હતો જેની જગ્યાએ બેથી વધુ વિષયોમાં રિએસેસમેન્ટ કરાવી શકે જેમાં કોઇ લેટ ફીસ કે પેનલ્ટી ફી લેવામાં ન આવે તેવી માંગ કરાઇ હતી. આ ઉપરાંત યુનિવર્સિટીમાં લાગેલા કેમેરા રીપેર કરાવી જરૂર પડે ત્યાં નવા કેમેરાનો ઉમેરો કરવા, યુનિવર્સિટી કેમ્પસમાં તથા ભવન અને કોલેજોમાં સાફ સફાઇ કરવા માણસો વધારવા પણ રજૂઆત થઇ હતી. બી.કોમ. સેમ.૨-૪ ઇકોનોમિક્સ સબ્જેક્ટમાં રીઝલ્ટ હજી ન આવતા બહારની યુનિવર્સિટીમાં પેપર તપાસી તાત્કાલિક રીઝલ્ટ આપવા માંગ કરાઇ છે અને જો મંગળવાર સુધીમાં નિર્ણય નહીં લેવાય તો આવનારા સમયમાં ઉગ્ર આંદોલન કરવાની ચિમકી ઉચ્ચારી છે.
વિદ્યાર્થી પરિષદની રજૂઆતને લઇ અધિકારીઓની બેઠક મળી
મ.કૃ.ભાવનગર યુનિવર્સિટીના વિવિધ પ્રશ્નોને લઇ વિદ્યાર્થી પરિષદ દ્વારા આજે ત્રણ કલાકની મેરેથોન રજૂઆતો બાદ મોટાભાગના પ્રશ્નો હલ કરવા કુલપતિ દ્વારા તાકીદે અધિકારીઓની બેઠક બોલાવી વિવિધ પ્રશ્નો અને તેના ઉકેલ માટેની વિસ્તૃત ચર્ચા કરવામાં આવી હતી અને ટૂંક સમયમાં પ્રશ્નોનું નિરાકરણ આવશે તેવું જણાયું હતું.
