Dollar Vs Rupee: અમેરિકાના પ્રમુખ ડોનાલ્ડ ટ્રમ્પે ટેરિફ લાગુ કરતાં ડોલર ઈન્ડેક્સ અને ક્રૂડ ઓઈલ કડડભૂસ થયા છે. જેનો સીધો લાભ ભારતીય રૂપિયાને થયો છે. આજે ડોલર સામે રૂપિયો 40 પૈસા સુધરી 85ની સપાટી અંદર પહોંચ્યો હતો. આ સાથે ભારતીય રૂપિયો આજે ડોલર સામે ત્રણ માસની ટોચે નોંધાયો છે.
ફોરેક્સ માર્કેટમાં આજે ડોલર સામે રૂપિયો 85.04 પર ખૂલ્યા બાદ ઘટી 84.99 થયો હતો. જે પાછલા સેશનમાં 85.44ના લેવલની તુલનાએ 40 પૈસા સુધારો દર્શાવે છે. ડિસેમ્બર, 2024 બાદ ડોલર સામે રૂપિયાનું મૂલ્ય 85 અંદર નોંધાયું છે.
મંદીની ભીતિથી ડોલરમાં ગાબડું
ટ્રમ્પના રેસિપ્રોકલ ટેરિફના કારણે વૈશ્વિક સ્તરે મંદીના વાદળો ઘેરા બન્યા છે. જેના કારણે ડોલર ઈન્ડેક્સ સપ્ટેમ્બર, 2024 બાદની સૌથી નીચી સપાટી 101.73 પર પહોંચ્યો છે. જે માર્ચમાં 2.39 ટકા ઉછળ્યા બાદ છેલ્લા પાંચ દિવસમાં 2.16 ટકા તૂટ્યો છે. ડોલર ઈન્ડેક્સે હાલમાં જ 110.18ની રેકોર્ડ ટોચ નોંધાવી હતી. ટ્રમ્પની ટેરિફની જાહેરાત બાદથી ડોલર છેલ્લા 15 દિવસમાં સતત ગગડી રહ્યો છે. જેના કારણે હાલ તે વાર્ષિક ધોરણે 6.16 ટકા અને ત્રિમાસિક ધોરણે 6.57 ટકાનો કડાકો નોંધાવ્યો છે.
ક્રૂડમાં કડાકો
ક્રૂડ ઓઈલની કિંમતો પણ કડડભૂસ થઈ છે. ઓપેક+ના ઉત્પાદન વધારવાના નિર્ણય વચ્ચે ટ્રમ્પે ટેરિફ લાદતાં ક્રૂડ ઓઈલ છ ટકા સુધી તૂટ્યું છે. ગઈકાલે બ્રેન્ટ ફ્યુચર્સ ક્રૂડ 6.42 ટકા તૂટી 70.14 ડોલર પ્રતિ બેરલ પર ક્વોટ થઈ રહ્યું હતું. આજે વધુ 1.54 ટકાના કડાકા સાથે 69.15 ડોલર પર ટ્રેડ થઈ રહ્યું છે. ભારત પોતાની જરૂરિયાતના 80 ટકાથી વધુ ક્રૂડ આયાત કરે છે. ક્રૂડના ભાવોમાં ઘટાડો અને ડોલરમાં પણ ગાબડાંના કારણે ભારતની ફોરેક્સ બચતમાં વધારો થવાની શક્યતા છે.
એલકેપી સિક્યુરિટીના રિસર્ચ એનાલિસ્ટ (કોમોડિટી અને કરન્સી) જતિન ત્રિવેદીએ જણાવ્યું કે, ડોલરની તુલનાએ રૂપિયામાં ઝડપી રિકવરી જોવા મળી છે. વૈશ્વિક સંકેતો અને એફઆઈઆઈના પ્રવાહના કારણે ડોલર સામે રૂપિયો 85-85.90ની રેન્જમાં રહેશે.
ભારતને ફાયદો
ડોલર સામે રૂપિયો મજબૂત બનતાં આયાતો સસ્તી થશે. જો કે, અમેરિકાથી આયાત કરવા પર લાગુ 26 ટકા રેસિપ્રોકલ ટેરિફનો બોજો ભારતીય આયાતકારો પર પડશે. ઓટોમોબાઈલ, ઈલેક્ટ્રોનિક્સ, એગ્રી, ક્રૂડ, મેટલ્સની આયાત સસ્તી થશે. ઉલ્લેખનીય છે, વૈશ્વિક વેપાર માટે ડોલર મુખ્ય કરન્સી સ્વરૂપે કાર્ય કરે છે.
