અમદાવાદ,રવિવાર
દારૂ અને ડ્રગ્સની આદતની સાથે નશા માટે કફ શીરપનો સેવન કરવાનું પ્રમાણ સતત વધતા ગેરકાયદે વેચાણ વધ્યું છે. જેમાં તબીબના પ્રિસ્ક્રીપશન વિના અનેક મેડીકલ ્સ્ટોરમાં વેચાણ થતુ હોવાનો એક વિડીયો વાયરલ થયો છે. જે અનુસંધાનમાં પોલીસ અને આરોગ્ય વિભાગે તપાસ શરૂ કરી છે. જેમાં અમદાવાદ ગ્રામ્ય વિસ્તારમાંથી કફશીરપનો જથ્થો લાવીને અનેક મેડીકલ સ્ટોર્સમાં સપ્લાય થતો હોવાનું જાણવા મળ્યું છે.નશાના બંધાણીઓ માટે અમદાવાદમાં ગેરકાયદે કફશીરપનું વેચાણ કરવામાં આવતું હોવાનો એક વિડીયો વાયરલ થયો હતો.જેમાં નવા વાડજ, નરોડા અને અન્ય વિસ્તારના કેટલાંક મેડીકલ સ્ટોર્સના સંચાલકો દ્વારા તબીબોના પ્રિસ્ક્રીપશન વિના જ મુળ કિંમતથી બમણી કિંમતે કફશીરપનું વેચાણ કરતા હોવાનું જાણવા મળ્યું હતું. એટલું જ નવા વાડજ સ્થિત મેેડીકલ સ્ટોરમાં કફશીરપનો મોટો જથ્થો હોવાની વિગતો મળી હતી. જેના આધારે પોલીસ અને આરોગ્ય વિભાગે અલગ અલગ ટીમ બનાવીને તપાસ શરૂ કરી હોવાનું જાણવા મળ્યું છે.
પોલીસે શરૂ કરેલી તપાસમાં વિગતો જાણવા મળી હતી કે બાવળા, ચાંગોદર અને બગોદરા વિસ્તારમાં અનેક લોકો મોટાપાયે ગેરકાયદે કફશીરપનો કારોબાર કરે છે. જે અમદાવાદમાં નિયમિત રીતે પહોંચતો કરે છે. કફશીરપનો નશો કરતો એક ચોક્કસ વર્ગ અમદાવાદમાં સક્રિય છે અને મેડીકલ સ્ટોર્સના સંચાલકો બમણી કિંમતે શીરપનું વેચાણ કરતા હતા.
