અમદાવાદ,ગુરુવાર,9
ઓકટોબર,2025
અમદાવાદ મ્યુનિસિપલ કોર્પોરેશન દ્વારા દસ વર્ષમાં સિકયુરીટી અને બાઉન્સર પાછળ રુપિયા ૨૪૪ કરોડનું આંધણ કરાયુ છે. આમ છતાં
સ્ટેન્ડિંગ કમિટીએ ભદ્રના દબાણ તેમજ
મ્યુનિસિપલ કોર્પોરેશનની મુખ્ય કચેરી સહીત અન્ય ઝોન કચેરીઓમાં આવતી લોકોની રેલીઓ
તથા બનતા ઘર્ષણના બનાવ નિયંત્રિત કરવા કર્નલ રુચિર કે વોરાની મહીને રુપિયા એક લાખ
પગાર અને વાહનની સુવિધા સાથે છ મહીનાના કોન્ટ્રાકટ ઉપર નિમણૂંક કરવા મંજૂરી આપી
છે. સિકયુરીટી,બાઉન્સર
ઉપરાંત પોલીસ અને એસ.આર.પી.ની મદદ લીધા છતાં સફળતા ના મળી તો કર્નલ શુ કરશે તેનો
જવાબ પદાધિકારીઓ આપી શકયા નહોતા.
મ્યુનિસિપલ કોર્પોરેશનની મુદત પુરી થવાનો સમય જેમ જેમ નજીક
આવતો જાય છે તેમ તેમ સત્તાધારી પક્ષના હોદ્દેદારો તેમને જે યોગ્ય લાગે તે પ્રકારની
દરખાસ્ત મંજૂર કરવા લાગ્યા છે.દલા તરવાડીના જેવા નિર્ણય લેવાઈ રહયા છે. સ્ટેન્ડિંગ
કમિટીએ મંજૂર કરેલી દરખાસ્ત મુજબ આર્મી કર્નલની કોર્પોરેશનમાં છ મહીના માટે
એન્ફોર્સમેન્ટ ઓફિસર તરીકે નિમણૂંક કરાઈ છે. ભદ્ર પ્લાઝા વિસ્તારમાં પીળા પટ્ટાથી
કરેલી માર્કિંગની જગ્યા સિવાયની જગ્યા દબાણમુકત રહે તે માટે પોલીસ સાથે સંકલન
કરવાની કામગીરી કરવાની રહેશે.ઉપરાંત સ્વચ્છ ભારત મિશન અંતર્ગત શહેરના જુદા જુદા
વિસ્તારમાં કામ કરતી ટીમ સાથે કોઈ ઘર્ષણનો બનાવ બને તે સમયે તેમજ શહેરના વિવિધ રોડ
ઉપર રખડતા પશુઓ પકડવાની કામગીરી કરતી કોર્પોરેશનના સી.એન.સી.ડી.વિભાગની ટીમ સાથે
ઘર્ષણના બનાવ સમયે પોલીસ સાથે સંકલન કરવાનુ રહેશે. એસ્ટેટ વિભાગ દ્વારા અલગ અલગ
વિસ્તારમાં ગેરકાયદેસર બાંધકામ તોડવામા આવે તે સમયે કોઈ અનિચ્છનીય બનાવ ના બને તે
જોવાનુ રહેશે.
કોર્પોરેશનમાં અઢી લાખના પગાર મેળવતા અધિકારીઓ પાસે
કામગીરી કરાવી શકાય
કોર્પોરેશનમાં વર્ષ-૨૦૧૯માં ૨૩ જેટલા આસિસ્ટન્ટ મ્યુનિસિપલ
કમિશનરોની નિમણૂંક કરાઈ છે. મહીને રુપિયા અઢીલાખ પગાર ઉપરાંત વાહન સહીતની સુવિધા
મેળવતા આ અધિકારીઓ પૈકી કોઈ એકને એન્ફોર્સમેન્ટ ઓફિસર તરીકે નિમણૂંક આપી શકાઈ
હોત.પરંતુ ભાજપના સત્તાધીશોએ અગમ્ય કારણસર એન્ફોર્સમેન્ટ ઓફિસર તરીકે આર્મી
કર્નલની નિમણૂંકને મંજૂરી આપી છે.
સિકયુરીટી,બાઉન્સર પાછળ
કયા વર્ષમાં કેટલી રકમ ચૂકવાઈ?
વર્ષ ચૂકવાયેલ
રકમ(કરોડમાં)
૨૦૧૫-૧૬ ૧૬.૩૨
૨૦૧૬-૧૭ ૧૫.૩૬
૨૦૧૭-૧૮ ૧૬.૧૫
૨૦૧૮-૧૯ ૧૫.૪૪
૨૦૧૯-૨૦ ૧૩.૮૭
૨૦૨૦-૨૧ ૩૧.૬૬
૨૦૨૧-૨૨ ૩૭.૩૯
૨૦૨૨-૨૩ ૩૪.૯૩
૨૦૨૩-૨૪ ૪૪.૧૦
૨૦૨૪-૨૫ ૧૯.૫૭
