સુરત મહાનગરપાલિકાની આજની સામાન્ય સભામાં મહિલા કોર્પોરેટરના બોલ બચ્ચન અને તું તું મે મે સામાન્ય સભાની ગરીમા લજવાઈ હતી. ભાજપના એક મહિલા કોર્પોરેટરો તો વિપક્ષી કોર્પોરેટરોને માપમાં રહેજો તેવું કહીને સભામાં જ ખુલ્લી ધમકી આપી દીધી હતી. આ ઉપરાંત ફાંકા ફોજદારી સાથે તું તું મે મે અને પુર્વ શાસક પક્ષ નેતા ને ફરી દવા પીવાનો વખત ન આવે તેવી ટિપ્પણી સાથે ભારે હોબાળો થયો હતો. જોકે, મહિલા કોર્પોરેટરની આવી બબાલ વચ્ચે સભામાં અનેક વખત હો હા થઈ ગઈ હતી.
સુરત પાલિકાની દિવાળી પહેલાની સામાન્ય સભામાં મહિલા કોર્પોરેટરોએ શબ્દોની કરેલી આતાશબાજી કારણે વિવાદમાં આવી હતી. વિપક્ષી નેતા પાયલ સાકરીયાએ શાસકોની દુખતી રગ પર હાથ મુકી કહ્યું હતું, હાલ વિકાસ સપ્તાહની ઉજવણી ચાલી રહી છે તેની વાત કરતા કહ્યું હતું કે, સુરતમાં ખાડાના કારણે લોકોના મોત થઈ રહ્યાં છે તે ઘણી જ દુઃખની વાત છે. સામાન્ય સભામાં ફાંકા ફોજદારીની અહીં વાત થાય છે બણગાં ફુંકવામાં આવે છે તેવી વાત કરતા ભાજપના મહિલા કોર્પોરટેરો ઉગ્ર થઈ ગયા હતા. એક મહિલા કોર્પોરટેરે તો તું તાથી વાત કરી દીધી હતી.
તો શાસક પક્ષના અન્ય કોર્પોરેટર ઉવર્શી પટેલે તો મોટા બરાડા પાડીને અનેક વાત કરી હતી અને ત્યાર બાદ સીધું વિપક્ષને કહી દીધું હતું કે માપમાં રહેજો. તો અનેક મુદ્દે માજી શાસક પક્ષ નેતા અમિત રાજપૂત ટિપ્પણી કરતા હતા તો વિપક્ષના મહિલા કોર્પોરેટરે એવી ટિપ્પણી કરી હતી કે જો જો ફરી દવા પીવાનો વખત નહીં આવે. આમ કોર્પોરટેરો એક બીજા સામે આડેધડ આક્ષેપ કરવા સાથે ધમકી આપતા હોવાથી સામાન્ય સભાની ગરીમા લજવાઈ હતી અને મેયર અનેક વખત પ્રેક્ષકોની ભૂમિકામાં આવી ગયા હતા.
