વડોદરાઃ ડિજિટલ પેમેન્ટ થકી વીજ બિલ ભરનારા ગ્રાહકોની સંખ્યામાં દર વર્ષે નોંધપાત્ર વધારો થઈ રહ્યો છે.મધ્ય ગુજરાત વીજ કંપનીમાં વીજ ભરવા માટે થયેલા ડિજિટલ ટ્રાન્ઝેક્શન માં એક જ વર્ષમાં ૨૦ ટકાનો વધારો નોંધાયો છે.
મળતા આંકડા પ્રમાણે ૨૦૨૩-૨૪ના વર્ષમાં વીજ બિલ ભરવા માટે ગ્રાહકોએ ૭૦ લાખ ડિજિટલ ટ્રાન્ઝેક્શન કર્યા હતા અને કુલ ૮૮૩૧ કરોડ રુપિયાનું બિલ ડિજિટલ પેમેન્ટ થકી ભર્યું હતું.તો ૨૦૨૪-૨૫માં ગ્રાહકોએ ૮૪ લાખ જેટલા ડિજિટલ ટ્રાન્ઝેક્શન કરીને ૯૧૩૮ કરોડ રુપિયાનું વીજ બિલ ભર્યું છે.વીજ કંપનીના સૂત્રોના જણાવ્યા અનુસાર ૨૦૨૪-૨૫ના વર્ષમાં ગ્રાહકોએ ભરેલા વીજ બિલની રકમ ૧૨૦૦૦ કરોડ રુપિયા થતી હતી.આમ લગભગ ૭૬ ટકા રકમ ડિજિટલ પેમેન્ટ થકી ચૂકવવામાં આવી છે.એક વર્ષમાં ટ્રાન્ઝેક્શનમાં ૨૦ ટકાનો વધારો થયો છે.ડિજિટલ પેમેન્ટના કારણે વીજ ગ્રાહકોને લાઈનમાં ઉભા રહીને બિલ ભરવાની કડાકૂટમાંથી પણ મુક્તિ મળી રહી છે.તો વીજ કંપની માટે રોકડ રકમ સાચવવાની અને બેન્કમાં રકમ જમા કરાવવાની કામગીરી ઓછી થઈ ગઈ છે.
૨૦૦૯થી ડિજિટલ પેમેન્ટની સુવિધા, પાંચ બેન્કો સાથે જોડાણ
વીજ કંપનીએ ડિજિટલ પેમેન્ટની સુવિધા તો ૨૦૦૯થી શરુ કરી છે.જોકે તે વખતે વીજ કંપનીની વેબસાઈટ પર જઈને ડેબિટ કાર્ડ કે ક્રેડિટ કાર્ડનો ઉપયોગ કરીને પેમેન્ટ કરવું પડતું હતુ.જેના કારણે ડિજિટલ ટ્રાન્ઝેક્શન ઓછા થતા હતા પરંતુ ૨૦૨૨ બાદ ડિજિટલ ટ્રાન્ઝેક્શનમાં ધરખમ વધારો થઈ રહ્યો છે.વીજ કંપનીએ ડિજિટલ પેમેન્ટ માટે પાંચ બેન્કો સાથે જોડાણ કરેલું છે.
ડિજિટલ ટ્રાન્ઝેક્શન વધારવા ૪૦૦૦ ગ્રામ પંચાયતોને પીઓએસ મશીનો અપાશે
ગ્રામ્ય વિસ્તારોમાં ડિજિટલ ટ્રાન્ઝેક્શન વધે તે માટે મધ્ય ગુજરાત વીજ કંપનીએ પોતાના કાર્યક્ષેત્રમાં આવતા ૪૦૦૦ ગામડાઓની પંચાયતોને પીઓએસ( પોઈન્ટ ઓફ સેલ) મશીન આપવાની યોજના બનાવી છે.તમામ ગ્રામ પંચાયતોને આગામી દિવસોમાં આ મશિનો આપવામાં આવશે.જેના થકી ગ્રામ્ય વિસ્તારના ગ્રાહકો પણ ડિજિટલ પેમેન્ટ કરી શકશે.પીઓએસ મશીન પર સામાન્ય રીતે ડેબિટ કાર્ડ અને ક્રેડિટ કાર્ડને સ્વાઈપ કરી શકાતા હોય છે પણ હવે તેના પર ક્યૂ આર કોડના કારણે યુપીઆઈ પેમેન્ટ પણ થઈ શકે છે.
