(પ્રતિનિધિ તરફથી) અમદાવાદ,ગુરૃવાર
સેન્ટ્રલ બોર્ડ ઓફ ડાયરેક્ટ ટેક્સિસે કેપિટલ ગેઈન એકાઉન્ટ સ્કીમમાં નવી કલમ ૫૪ જીએનો ઉમેરો કરીને કરદાતાઓને પહેલા ચેકથી જ રકમ જમા કરાવવાની વ્યવસ્થાને બદલે હવે ઇલેક્ટ્રોનિક મોડથી પેમેન્ટ કરવાની સુવિધા પૂરી પાડવાનો નિર્ણય લીધો છે. આ જ રીતે એકાઉન્ટના હાર્ડ કોપીમાં ઉતારાની નકલ પૂરી પાડવાને બદલે ખાતામાં થયેલા આર્થિક વહેવારોની ઇલેક્ટ્રોનિક કોપી આપવાની પણ સુવિધા કરી આપી છે.આ જ રીતે બેન્કની પાસબુકની ઝેરોક્સ કોપી આપવાને બદલે ઇલેક્ટ્રોનિક કોપી આપવાની પણ સુવિધા કરી આપી છે.
કેપિટલ ગેઈન એકાઉન્ટ સ્કીમમાં અત્યાર સુધીમા ંચેકથી કે પછી ડિમાન્ડ ડ્રાફ્ટથી પૈસા જમા કરાવવામાં આવતા હતા. હવે ઓનલાાઈન પેમેન્ટ કરવાની પણ છૂટ આપવામાં આવી છે. કેપિટલ ગેઈન એકાઉન્ટ સ્કીમ હેઠળ ચાલુ કરેલું ખાતું બંધ કરાવવા માટે ફોર્મ જી અને ફોર્મ એચ ફિઝિકલ કોપીમાં ભરીને આપવું પડતું હતું. હવે આ સુવિધા ઓનલાઈન ફોર્મ જી અને ફોર્મ એચ ફાઈલ કરીને પણ મેળવી શકાશે. તેને માટે તેમણે ડિજિટલ સિગ્નેચર આપવી પડશે. પહેલી એપ્રિલ ૨૦૨૭થી આ સુવિધા મળશે.તેને માટે કોડ વેરિફિકેશનની વ્યવસ્થા પણ ઊભી કરવામાં આવશે.
કેપિટલ ગેઈન ટેક્સમાં આવકવેરા ધારાની કલમ ૫૪, ૫૪બી, ૫૪ ડી, ૫૪ એફ, ૫૪ જી અને ૫૪ જીબી હેઠળ રાહત મેળવવામાં આવે છે. આ સ્કીમને લગતી વ્યવસ્થા કરવાની જવાબદારી ઇન્કમટેક્સ સિસ્ટમ ડિરેક્ટોરેટને માથે નાખવામાં આવી છે. આ નવી વ્યવસ્થા હેઠળ આવનારા ડેટાની સિક્યોરિટીની જવાબદારી પણ તેમણે જ નિભાવવાની રહેશે. તદુપરાંત ફોર્મ એ અને ફોર્મ સીમાં સુધારો કરવામાં આવ્યો છે. ફોર્મ એ અને ફોર્મ સીમાં સુધારો કરીને કલમ ૫૪ જીએ દાખલ કરવામાં આવી છે.તેના માધ્યમથી જ ઇલેક્ટ્રોનિક પેમેન્ટની વિગતો અમલમાં મૂકવામાં આવશે.સ્કીમમાં જોડાયેલા કરદાતાઓ રિયલ ટાઈમ ગ્રોસ સેટલમેન્ટ-આરટીજીએસ, નેશનલ ઇલેક્ટ્રોનિક ફંડ ટ્રાન્સફર-નેફ્ટ કે પછી આઈએમપીએસ-ઇમિડિયેટ પેમેન્ટ સર્વિસના ટ્રાન્ઝેક્શન નંબરથી આ વ્યવસ્થાને નિયંત્રિત કરવામાં આવશે.
(બોક્સ)
કેપિટલ ગેઈન એકાઉન્ટ સર્વિસ સ્કીમ શું છે?
કેપિટલ ગેઈન એકાઉન્ટ સ્કીમ ૧૯૮૮માં કરદાતાએ કરેલા મકાનના કે અન્ય અસ્ક્યામતોના વેચાણ પર થયેલા કેપિટલ ગેઈનની રકમને કામચલાઉ ધોરણે એક ખાતામાં જમા કરાવી દઈને વેરા માફીના લાભ મેળવી લે છે. આ એકાઉન્ટમાં નોર્મલ કરતાં ઓછું વ્યાજ આપવામાં આવે છે. ત્રણ વર્ષ સુધીનો લૉક ઇન પિરિયડ પણ છે. આવકવેરાની જુદી જુદી કલમ હેઠળ કેપિટલ ગેઈન ટેક્સમાંથી માફી માગવામાં આવે છે. કરદાતાને મકાનના કે પછી જમીનના વેચાણ થકી થયેલા કેપિટલ ગેઈનની રકમ તે નવી મિલકતની ખરીદી માટે ઉપયોગમાં ન લઈ શકે તો તેવા સંજોગોમાં તે રકમ કેપિટલ ગેઈન એકાઉન્ટ સ્કીમમાં રોકી દે છે.
શહેરી વિસ્તારની બેન્ક શાખાઓમાં કેપિટલ ગેઈન એકાઉન્ટ સર્વિસ પૂરી પાડશે
સેન્ટ્રલ બોર્ડ ઓફ ડાયરેક્ટ ટેક્સિસે બહાર પાડેલી કેપિટલ ગેઈન એકાઉન્ટ સ્કીમને લગતા નોટિફિકેશન મુજબ શહેરી વિસ્તારની બેન્કોની શાખાઓમાં એચડીએફસી બેન્કલિમિટેડ, આઈસીઆઈસીઆઈ બેન્ક લિમિટેડ, એક્સિસ બેન્ક લિમિટેડ, સિટિ યુનિયન બેન્ક લિમિટેડ, ડીસીબી બેન્ક લિમિટેડ, ફેડરલ બેન્ક લિમિટેડ, આઈડીએફસી ફર્સ્ટ બેન્ક લિમિટેડ, કરુર વૈશ્ય બેન્ક, કોટક મહિન્દ્રા બેન્ક,આરબીએલ બેન્ક લિમિટેડ, સાઉથ ઇન્ડિયન બેન્ક લિમિટેડ, યશ બેન્કલિમિટેડ, ધનલક્ષ્મી બેન્ક લિમિટેડ, બંધન બેન્ક લિમિટેડ, સીએસબી બેન્ક લિમિટેડ, તામિલનાડ મર્કન્ટાઈલ બેન્ક લિમિટેડનો સમાવેશ કરવામાં આવ્યો છે. પરિણામે મેટ્રો શહેરમાં, શહેરી વિસ્તારોમાં અને અર્ધશહેરી વિસ્તારોમાં વધુ સંખ્યામાં બેન્કોમાં કેપિટલ ગેઈન એકાઉન્ટ સ્કીમના ખાતા ખોલાવી શકાશે.પરિણામે કરદાતાઓ માટે સ્કીમ મુજબ નાણાં રોકવાનું સરળ બનશે. મર્યાદિત બેન્કો પર મદાર બાંધવો પડશે નહિ.
