અમદાવાદ : ડોલર સામે તૂટતા રૂપિયાની ચિંતામાં આર્થિક તંત્ર વ્યસ્ત છે પરંતુ સિક્કાની બીજી બાજુએ છેકે ઉછળતા ડોલરના કારણે દેશના ઇન્ફોર્મેશન ટેકનોલોજી (IT) ક્ષેત્રને અધધ..કહી શકાય એવો ૨૮૩ અબજ ડોલરનો લાભ થશે. ગઇકાલે બુધવારે જ્યારે તૂટતા રૂપિયાએ સંવેદનશીલ એવું ૯૦નું લેવલ વટાવ્યું ત્યારે ચોમેરથી સરકારની ટીકા થઇ હતી. જોકે આ ટીકા વચ્ચે આઇટી ક્ષેત્રને થનારા તગડા લાભ તરફ કોઇનું ધ્યાન ગયું નહોતું. વર્તમાન નાણા વર્ષમાં પ્રથમવાર રૂપિયો ૫.૪ ટકા જેટલો તૂટયો હતો.
તૂટતા રૂપિયાથી દેશના ટેકનોલોજી ક્ષેત્રને લાભ થવાની સંભાવના જોવા મળી રહી છે. ટાટા કન્સલટન્સી સર્વિસ,ઇન્ફોસિસ, એચસીએલ ટેકનોલોજી અને વિપ્રો સહીતની ભારતની આઇટી કંપનીઓનો ૪૦ ટકા જેટલો બિઝનેસ અમેરિકાથી આવે છે. તેનું પેમેન્ટ ડોલરમાં થાય છે. ડોલરના વધુ ભાવ આ કંપનીઓ માટે વધુ નફા સમાન છે.
વર્ષની શરૂઆતથીજ રૂપિયો તૂટયો છે. જેના કારણે દેશની ટોપની પાંચ આઇટી કંપનીઓને લાભ થયો છે. મુંબઇ સ્થિત ટીસીએસને રેવન્યૂમાં યુકેના ક્લાયન્ટને ૧૭.૫ ટકા જેટલો લાભ થયો હતો. અનેક કંપનીઓએ યુકેની આવક હજુ જાહેર નથી કરી.
ઓછી ડિમાન્ડ અને વધુ ખર્ચાના પગલે છેલ્લા એક દાયકાથી આઇટી સેક્ટર મંદીમાં અટવાયેલું છે. ટોપની પાંચ આઇટી કંપનીઓમાંથી માત્ર ત્રણ કંપનીઓ વાર્ષિક સ્તરે પાંચ ટકાથી વધુ ગ્રોથ નોંધાવી શકી હતી. ટીસીએસની રેવન્યૂ ૩.૭૮ ટકા,એચસીએલની ૪.૩ ટકા, વિપ્રોની ૨.૭૨ ટકા નોંધાઇ હતી.
તૂટતો રૂપિયો આઇટી કંપનીઓને લાભ કરાવતો ગયો છે. રૂપિયો ૧ ટકા જેટલો તૂટે તો ૧૦ થી ૧૫ બેસીસ પોઇન્ટનો ફરક પડે છે. યુરો, ડોલર અને પાઉન્ડની કિંમતમાં ઉછાળો આવે એેટલે ભારતની ટેકનોલોજી કંપનીઓની આવકમાં વધારો થાય છે.
