Ranip D-Mart crossroads incident: અમદાવાદ શહેરમાં ટ્રાફિક નિયમોનું પાલન કરાવતા પોલીસકર્મીઓ પર હુમલા અને ફરજમાં રૂકાવટની ઘટનાઓમાં ચિંતાજનક વધારો થઈ રહ્યો છે. આવી જ એક ઘટનામાં, રાણીપ ડી-માર્ટ ચાર રસ્તા પર ટ્રાફિક સિગ્નલ ભંગ કરવા બદલ દંડ વસૂલનારા પોલીસકર્મી સાથે ઘર્ષણ કરનાર ફોર્ચ્યુનર કારના ચાલકની પોલીસે ધરપકડ કરી છે.
આરોપીએ માત્ર ટ્રાફિક નિયમોનું ઉલ્લંઘન જ નહોતું કર્યું, પરંતુ ફરજ પરના પોલીસકર્મીને નોકરી પરથી સસ્પેન્ડ કરાવી દેવાની ધમકી આપી તેમની કામગીરીમાં અડચણ ઊભી કરી હતી. આ ગંભીર ગેરવર્તણૂક બદલ ‘બી’ ટ્રાફિક પોલીસ સ્ટેશનમાં વિધિવત ફરિયાદ નોંધાવવામાં આવી છે, જેના આધારે પોલીસે કાયદેસરની કાર્યવાહી હાથ ધરી છે.
મેમો ફાડવાની અદાવત રાખી ફોર્ચ્યુનર ચાલકે ટ્રાફિક પોલીસને હેરાન કરવાનો પ્રયાસ કર્યો
ગત 3 ફેબ્રુઆરીના રોજ એક શખ્સ પોતાની ફોર્ચ્યુનર ગાડી લઈને પસાર થઈ રહ્યો હતો, તે દરમિયાન તેણે રાણીપ ડી-માર્ટ ચાર રસ્તા પર ટ્રાફિક સિગ્નલનું ઉલ્લંઘન કર્યું હતું. ફરજ પર તૈનાત પોલીસકર્મીઓએ ગાડી રોકીને નિયમ ભંગ બદલ મેમો આપતા આરોપી ઉશ્કેરાઈ ગયો હતો અને પોલીસ સ્ટાફ સાથે ઉગ્ર રકઝક કરી હતી.
આ મેમો ફાડવાની બાબતની અદાવત રાખીને, બીજા દિવસે રાત્રિના સમયે આરોપી ફરીથી તે જ સ્થળે પહોંચ્યો હતો. આ વખતે તેણે પોતાની ગાડી અત્યંત પૂરઝડપે અને ગફલતભરી રીતે ચલાવીને ભયનું વાતાવરણ ઊભું કર્યું હતું. પોલીસને હેરાન કરવાના ઈરાદે તેણે રસ્તાની વચ્ચે એકાએક બ્રેક મારીને ગાડી ઊભી રાખી દીધી હતી, જેના કારણે ટ્રાફિકમાં ભારે અડચણ ઊભી થઈ હતી.
આ પણ વાંચો: મોબાઈલ હવે ‘આંખ’ બગાડશે, 2025 સુધીમાં 50% બાળકોને ચશ્માની જરૂર પડશે
ધમકી અને ગેરવર્તણૂક
ગાડીમાંથી નીચે ઉતરીને આરોપીએ સીધો જ પોલીસકર્મીને પૂછ્યું હતું કે, ‘ગઈકાલે તે કેમ મારી ગાડીનો ફોટો પાડ્યો હતો?” આટલું કહી તેણે જાહેરમાં ગાળો ભાંડવાનું શરૂ કર્યું હતું. ઉદ્ધત વર્તન કરતા આરોપીએ પોલીસકર્મીને ધમકાવતા કહ્યું કે, ‘હું તને નોકરી પરથી સસ્પેન્ડ કરાવી નાખીશ અને ગાડી રસ્તાની વચ્ચે જ ઊભી રાખી દઈશ, તું હજુ મને ઓળખતો નથી.’
આમ, જાહેર માર્ગ પર પૂરઝડપે ગાડી ચલાવી, ટ્રાફિકને અડચણ ઊભી કરી અને પોલીસની કાયદેસરની ફરજમાં રૂકાવટ કરીને ભયનું વાતાવરણ સર્જવા બદલ પોલીસે ગુનો નોંધ્યો છે. પોલીસે આરોપીની અટકાયત કરી તેની સામે કાયદેસરની કડક કાર્યવાહી હાથ ધરી છે.
