મુંબઈ : મુંબઈ ઝવેરી બજારમાં આજે સોના-ચાંદીના ભાવમાં ઘટાડો વેગથી આગળ વધ્યો હતો. વિશ્વ બજાર ગબડતાં ઘરઆંગણે ઈમ્પોર્ટ કોસ્ટ નીચી ઉતરી હતી. ઝવેરી બજારમાં તૂટતી બજારે નવી માગના અભાવે માનસ વિશ્વ બજાર પાછળ વેંચવાનું રહ્યું હતું. વિશ્વ બજારમાં ડોલર ઈન્ડેક્સ વધતાં સોનામાં ફંડોનું સેલીંગ જળવાઈ રહ્યાના વાવડ મળ્યા હકા. વૈસ્વિક સોનાના ભાવ ઔંસના ૫૦૦૩ વાળા ગબડી નીચામાં ભાવ ૪૮૬૦ થઈ ૪૯૩૭થી ૪૯૩૮ ડોલર રહ્યા હતા.
દરમિયાન, ઘરઆંગણે અમદાવાદ ઝવેરી બજારમાં સોનાના ભાવ ૧૦ ગ્રામના રૂ.૩૫૦૦ તૂટી ગયા હતા. જ્યારે ચાંદીના ભાવ કિલોના રૂ.૧૦ હજાર ગબડયા હતા. વિશ્વ બજારમાં સોના પાછળ ચાંદીના ભબાવ ઔંસના ૭૬.૯૯ વાળા નીચામાં ભાવ રૂ.૭૨.૮૦ થઈ ૭૪.૮૩થી ૭૪.૮૪ ડોલર રહ્યા હતા.
અમદાવાદ બજારમાં ચાંદીના ભાવ ગબડી રૂ.૨૩૫૦૦૦ બોલાયા હતા જ્યારે અમદાવાદ સોનાના ભાવ તૂટી ૯૯૫ના રૂ.૧૫૫૭૦૦ તથા ૯૯૯ના રૂ.૧૫૬૦૦૦ બોલાયા હતા. વિશ્વ બજારમાં અન્ય કિંમતી ધાતુઓના ભાવમાં પણ ઘટાડો જોવા મળ્યો હતો. પ્લેટીનમના ભાવ ઔંસના ૨૦૩૯ વાળા નીચામાં ભાવ ૧૯૮૬ થઈ ૨૦૧૧ થી ૨૦૧૨ ડોલર રહ્યા હતા.
પેલેડીયમના ભાવ ૧૬૯૮ વાળા નીચામાં ભાવ ૧૬૫૯ થઈ ૧૬૮૧થી ૧૬૮૨ ડોલર રહ્યા હતા. વૈશ્વિક કોપરના ભાવ આજે ૨.૦૬ ટકા તૂટયા હતા. જોકે વિશ્વ બજારમાં આજે જ્યારે વિવિધ કોમોડિટીઝના ભાવ તૂટી રહ્યા હતા ત્યારે ક્રૂડતેલના ભાવ ઉંચકાયા હતા. બ્રેન્ટ ક્રૂડના ભાવ બેરલના ૬૭.૯૧ વાળા વધી ૬૯.૦૪ થઈ ૬૮.૬૭ ડોલર રહ્યા હતા.
યુએસ ક્રૂડના ભાવ ૬૩.૦૪ વાળા વધી ૬૪.૧૪ થઈ ૬૩.૭૫ ડોલર રહ્યા હતા. અમેરિકા તથા ઈરાન વચ્ચે તેમ જ રશિયા અને યુક્રેન વચ્ચે થઈ રહેલી વાટાઘાટો પર બજારની નજર રહી હતી. અમેરિકા સાથે વાતચીત પૂર્વે ઈરાને મિસાઈલ ફાયર કર્યાના સમાચારની અસર ક્રૂડતેલ બજાર પર દેખાઈ હતી. રશિયા તથા યુક્રેન વચ્ચે પણ વાતચીત પૂર્વે તંગદિલી તથા ઘર્ષણ વધ્યાના નિર્દેશો મળ્યા હતા.
દરમિયાન, મુંબઈ બુલિયન બજારમાં આજે સોનાના ભાવ જીએસટી વગર તૂટી ૯૯૫ના રૂ.૧૫૦૫૯૦ થઈ રૂ.૧૫૧૨૫૭ રહ્યા હતા જ્યારે ૯૯૯ના ઘટી રૂ.૧૫૧૧૯૫ થઈ રૂ.૧૫૧૮૬૫ રહ્યા હતા. મુંબઈ ચાંદીના ભાવ જીએસટી વગર તૂટી રૂ.૨૩૨૯૫૫ રહ્યા હતા. મુંબઈ બજારમાં પ્લેટીનમના ભાવ ૧૦ ગ્રામના રૂ.૩૦૦૦ તૂટી રૂ.૬૧૬૭૯ બોલાયા હતા.
