ફાયર વિભાગની તાત્કાલિક કામગીરીથી પરિસ્થિતિ કાબૂમાં
અમદાવાદ, સંજીવ રાજપૂત, એબીએનએસ: અમદાવાદ શહેરના વૈષ્ણવદેવી સર્કલ નજીક આવેલા પહેલ લેક વ્યૂ કોમર્શિયલ કોમ્પ્લેક્સમાં બુધવારે બપોરે આગ લાગવાની ઘટના બનતા વિસ્તારમાં થોડા સમય માટે અફરાતફરી મચી ગઈ હતી.
મળતી માહિતી મુજબ બપોરે અંદાજે 14:20 કલાકે 11મા માળે આવેલા ઓફિસ નંબર 1113-1114માંથી ધુમાડો નીકળતો જોવા મળ્યો હતો. ઘટનાની જાણ થતા તરત જ ફાયર વિભાગને અંગાર કોલ આપવામાં આવ્યો હતો.
પ્રાથમિક માહિતી મુજબ ઓફિસની બાલ્કનીમાં એસી ફેબ્રિકેશન માટે વેલ્ડીંગનું કામ ચાલી રહ્યું હતું. આ દરમિયાન વેલ્ડીંગના તણખા ઉડીને એસીના આઉટર યુનિટ પાસે પડેલા કચરામાં પડ્યા હતા,જેના કારણે આ ઘટના સર્જાઈ હતી. આગ લાગતાં જ ધુમાડો 12મા અને 13મા માળ સુધી ફેલાઈ ગયો હતો, જેના કારણે બિલ્ડિંગમાં રહેલા લોકોમાં થોડા સમય માટે ભયનો માહોલ સર્જાયો હતો.
ઘટનાની જાણ થતાં ચાંદખેડા ફાયર ફાઇટર, ગજરાજ તેમજ થલતેજ ફાયર સ્ટેશનની ટીમો તાત્કાલિક ઘટના સ્થળે પહોંચી ગઈ હતી.
ફાયર વિભાગના અધિકારીઓ તથા એસટીઓના માર્ગદર્શન હેઠળ બચાવ અને આગ બુઝાવવાની કામગીરી હાથ ધરવામાં આવી હતી. ઘટનાસ્થળે એક જમાદાર, 8 ડ્રાઈવર અને 18 ફાયરમેન સહિતની ટીમ દ્વારા આગ પર કાબૂ મેળવ્યો હતો.
ફાયર વિભાગની ઝડપી કામગીરીને કારણે આગ વધુ ફેલાતી અટકાવવામાં સફળતા મળી હતી. આ ઘટનામાં કોઈ જાનહાનિ કે ઇજા થયાની માહિતી નથી. હાલ પરિસ્થિતિ સંપૂર્ણપણે કાબૂમાં હોવાનું ફાયર વિભાગે જણાવ્યું છે.
