મુંબઈ : સરકારે આયાતકારો માટે ડોલરના કસ્ટમ એક્સચેન્જના દર રૂ.૯૩.૮૦થી વધારી રૂ.૯૪.૨૦ કર્યાના સમાચાર હતા. દેશમાં આયાત થતા વિવિધ ખાદ્યતેલોની ઈમ્પોર્ટ ડયુટી ગણવા બેન્ચમાર્ક તરીકે વપરાતી ટેરીફ વેલ્યુમાં પણ સરકારે વૃધ્ધિ કરતાં આયાતી ખાદ્યતેલોની ઈફેકટીવ ઈમ્પોર્ટ ડયુટીમાં વૃધ્ધિ થઈ હોવાનું બજારના જાણકારો જણાવી રહ્યા હતા.
આવી ટેરીફ વેલ્યુ ક્રૂડ પામ ઓઈલમાં ૧૧૪૧થી વધી ૧૧૭૪ ડોલર કરાઈ છે જ્યારે આરબીડીની ૧૧૭૦ વાળી ૧૨૦૨ ડોલર તથા સોયાતેલ ડિગમની ૧૨૨૪ વાળી ૧૨૫૨ ડોલર કરવામાં આવી હોવાના સમાચાર મળ્યા હતા.
આના પગલે ઈફેકટીવ ઈમ્પોર્ટ ડયુટી સીપીઓનાં ટનના રૂ.૫૧૧ વધી છે જ્યારે આરબીડી પામોલીનમાં ટનના રૂ.૧૦૭૩ વધી છે જ્યારે સોયાતેલ ડિગમમાં રૂ.૪૩૪ વધી હોવાનું બજારના જાણકારો જણાવી રહ્યા હતા.
મુંબઈ તેલિ-બિયાં બજારમાં આજે વિવિધ દેશી તથા આયાતી ખાદ્યતેલોના ભાવ બેતરફી વધઘટ વચ્ચે અથડાતા રહ્યા હતા. નવા વેપાર ધીમા હતા. મુંબઈ હાજર બજારમાં આજે ૧૦ કિલોના ભાવ દિવેલના રૂ.પાંચ ઘટતાં એરંડાના હાજર ભાવ કિવ. દીઠ રૂ.૨૫ નરમ રહ્યા હતા. મુંબઈ ખોળ બજારમાં એરંડા ખોળના ભાવ ટનના રૂ.૫૦ વધ્યા હતા જ્યારે અન્ય ખોળો શાંત હતા.
