મુંબઈ : મુંબઈ ઝવેરીબજારમાં આજે સોના- ચાંદીના ભાવમાં પીછેહટ જોવા મળી હતી. વિશ્વબજારના સમાચાર ફંડોનું સેલીંગ વધ્યું હોવાનું જાણકારો જણાવી રહ્યા હતા. દરમિયાન, વિશ્વબજારમાં ક્રૂડ તેલના ભાવ ઉછળી મોરલદીઠ ૧૦૦ ડોલર પાર કરી ગયાના સમાચાર હતા.
ઈરાન તથા અમેરિકા વચ્ચે શાંતિના બદલે ઘર્ષણની સ્થિતિ વધી રહ્યાના નિર્દેશો વચ્ચે વિશ્વબજારમાં ક્રૂડતેલના ભાવ ઉછળ્યા હતા. ઈરાનના સૈનિકોએ સ્ટ્રેઈટ ઓફ હોર્મુઝને ફરી બ્લોક કર્યાના વાવડ હતા.
હવે એશિયાના રિફાઈનર્સ જહાજોનો માર્ગ અરબી પનામા કેનાલ તરફ જતાં પ્રિમિયમો વધ્યા હતા. વિશ્વબજારમાં બ્રેન્ટ ક્રૂડના ભાવ વધી ઉંચામાં ૧૦૦.૩૯ ડોલર થઈ ૯૯.૨૭ ડોલર રહ્યા હતા. જ્યારે યુએસ ક્રૂડના ભાવ ઉંચામાં ૯૧.૪૧ થઈ ૮૯.૯૪ ડોલર રહ્યા હતા.
દરમિયાન, વિશ્વબજારમાં સોનાના ભાવ ઔંશના ૪૭૯૩ વાળા નીચામાં ૪૭૧૫ ડોલર થઈ ૪૭૫૧થી ૪૭૫૨ ડોલર રહ્યા હતા. દરમિયાન, મુંબઈ બુલીયન બજારમાં આજે સોનાના ભાવ ૧૦ ગ્રામના રૂ.૨૫૦ ઘટયા હતા જ્યારે મુંબઈ ચાંદીના ભાવ કિલોના રૂ.૩૦૦૦ તૂટયા હતા.
અમદાવાદ ઝવેરીબજારમાં આજે સોનાના ભાવ ૯૯૫ના રૂ.૧૫૬૭૦૦ તથા ૯૯૯ના રૂ.૧૫૭૦૦૦ રહ્યા હતા જ્યારે અમદાવાદ ચાંદીના ભાવ રૂ.૨૫૦૦૦૦ રહ્યા હતા. દરમિયાન, મુબઈ બજારમાં સોનાના ભાવ ઘટી જીએસટી વગર ૯૯૫ના રૂ.૧૫૧૫૦૭ તથા ૯૯૯ના રૂ.૧૫૨૧૧૬ રહ્યા હતા જ્યારે મુંબઈ ચાંદીના ભાવ જીએસટી વગર ઘટી રૂ.૨૪૮૬૮૨ રહ્યા હતા. મુંબઈ સોના- ચાંદીમાં જીએસટી સાથેના ભાવ આ ભાવથી ત્રણ ટકા ઉંચા રહ્યા હતા.
દરમિયાન, વિશ્વબજારમાં પ્લેટીનમના ભાવ ઔશના ૨૦૮૭ વાળા નીચામાં ભાવ ૨૦૩૧ થઈ ૨૦૮૪થી ૨૦૮૫ ડોલર રહ્યા હતા. મુંબઈ પ્લેટીનમના ભાવ ૧૦ ગ્રામના રૂ.૨૫૦૦ વધી રૂ.૬૮૧૨૧ રહ્યા હતા. વિશ્વબજારમાં પેલેડીયમના ભાવ ૧૫૬૮ વાળા નીચામાં ૧૫૪૬ તથા ઉંચામાં ૧૫૮૦ થઈ ૧૫૭૨થી ૧૫૭૩ ડોલર રહ્યા હતા. વૈશ્વિક કોપરના ભાવ આજે ૦.૮૧ ટકા પ્લસમાં રહ્યા હતા. ઈરાન તથા અમેરિકા વચ્ચે હવે બનાવો કેવો વળાંક લે છે તેના પર બજારની નજર હતી. વૈશ્વિક ચાંદી ગબડી ૭૬.૬૬ થઈ ૭૮.૦૯ ડોલર રહ્યા હતા.
