Surat Corporation Election : સુરત મહાનગરપાલિકાની ચૂંટણી 2026 ની ચૂંટણી માટે પ્રચારના પડઘમ શાંત થઈ રહ્યાં છે ત્યારે વરાછા કતારગામ અને લિંબાયતને બાદ કરતા મોટાભાગના વિસ્તારમાં નિરસ વાતાવરણ જોવા મળી રહ્યું છે. જોકે, પાટીદાર બહુમતીવાળા વરાછા-કતારગામ વિસ્તારમાં ભાજપ અને આપ બંને પક્ષોને ઘરના ભેદીનો સૌથી મોટો ખતરો હોવાનું કહેવાઈ રહ્યું છે. છેલ્લી ઘડીએ મતદારોને રીઝવવા માટે એડીચોટીનું જોર લગાવવાનું શરુ થઈ રહ્યું છે અને ડોર ટુ ડોર પ્રચાર અને સમાજના નામે આખરી દાવ થઈ રહ્યો છે જેમાં છેલ્લી ઘડીના ગોઠવણ નો ખેલ થઈ રહ્યો છે. પહેલીવાર નબળા અને બિનઅનુભવી ભાજપ સંગઠનના કારણે ધારાસભ્યો પોતાના વિસ્તારમાં કમાન હાથમાં લીધી છે. ચૂંટણીમાં અંતિમ કલાકોમાં અંદરખાને થઈ રહેલી ગોઠવણ અંગે અનેક અટકળો થઈ રહી છે.
10 હજાર કરોડ કરતા વધુનું બજેટ ધરાવતી સુરત પાલિકા પર કબ્જો મેળવવા માટે ભાજપ-આપ-કોંગ્રેસ વચ્ચે ત્રિપાંખીયો જંગ છે. પાટીદાર બહુમતીવાળા એવા વરાછા-કતારગામ અને લિંબાયત કેટલીક બેઠકો ટક્કર જોવા મળી રહી છે જ્યારે અન્ય બેઠક પર નિરસ વાતાવરણ જોવા મળી રહ્યું છે. પાટીદાર બહુમતીવાળા વિસ્તાર વરાછા અને કતારગામમાં ગત ચૂંટણીમાં 27 બેઠક મળી હતી ત્યાં ભાજપ અને આપ બંને માટે ઘરના ભેદીનો ખતરો લાગી રહ્યો છે.
ટિકિટ ફાળવણી બાદ નારાજગીના કારણે કાર્યકરોમાં જુથવાદ-જ્ઞાતિવાદ અને આંતરિક અસંતોષ ભાજપ અને આપ બન્નેમાં જોવા મળી રહ્યો છે. હવે ચૂંટણીના અંતિમ તબક્કામાં ખુલ્લેઆમ નહીં પરંતુ અંદરખાને અસર કરી રહ્યા છે. કોણ ગદ્દારી કરશે ? અને કેટલું નુકસાન પહોંચાડશે? તે અનિશ્ચિતતાએ બંને પક્ષોની ચિંતા વધારી દીધી છે. કેટલાક વિસ્તારોમાં છેલ્લી ઘડીએ ગોઠવણ અને મત ટ્રાન્સફરના પ્રયાસો તેજ બન્યા છે, જેમાં સમાજના નામે બેઠક, ગુપ્ત મીટિંગો અને વ્યક્તિગત સમજાવટ દ્વારા મતદારોને પ્રભાવિત કરવાનો જોરદાર ખેલ ચાલી રહ્યો છે. પ્રચારના અંતિમ કલાકોમાં હવે ડોર-ટુ-ડોર અભિયાનને વધુ તેજ કરવામાં આવ્યું છે. ઉમેદવારો અને તેમના સમર્થકો એક-એક મત માટે એડીચોટીનું જોર લગાવી રહ્યા છે.
આ ચૂંટણીમાં ભાજપ માટે આ ચૂંટણીમાં સૌથી નબળું પાસું બિનઅનુભવી શહેર સંગઠન છે. પરિસ્થિતિ એટલી ગંભીર બની ગઈ છે કે અનેક વિસ્તારોમાં ધારાસભ્યોને પોતે જ મેદાનમાં ઉતરી કમાન સંભાળી પડી રહી છે, જે સંગઠનની અંદરની કમજોરીને ખુલ્લી પાડે છે. બીજી તરફ આપમાં પણ આંતરિક મતભેદ અને ઉમેદવારો વચ્ચેની અસંતોષની અસર જોવા મળી રહી છે, જેના કારણે અંતિમ ક્ષણોમાં ગોઠવણો વધુ તેજ બની ગઈ છે.
ચૂંટણીના અંતિમ કલાકોમાં અંદરખાને ચાલી રહેલી ગોઠવણો, સેટિંગ અને ગદ્દારીની અટકળોએ સમગ્ર રાજકીય માહોલ તણાવપૂર્ણ બનાવી દીધો છે.
એકંદરે બહારથી શાંત દેખાતી આ ચૂંટણી અંદરખાને સળગી રહી છે. શનિવારની આ ગોઠવણની કતલની રાતમાં જ જીત-હારનું સમીકરણ ઘડાઈ જશે. અંતિમ કલાકોના ગુપ્ત સોદા અને ગદ્દારીના ખેલથી પડશે. પરિણામના દિવસે જ ખુલશે કે અંદરખાને કોણે બાજી મારી અને કોણે પોતાના ખેલ બગાડ્યો તે ખબર પડશે. હાલ આ અંગે અનેક અટકળો થઈ રહી છે.
