Vadodara Jilla Panchayat Election : વડોદરા જિલ્લા પંચાયતમાં કોંગ્રેસને મોટી પછડાટ ખાવી પડી છે અને માત્ર બે જ સીટ હાંસલ કરી છે. જ્યારે ભાજપે કુલ 34 માંથી 32 સીટ મેળવી સત્તા જાળવી રાખી છે.
વડોદરા જિલ્લા પંચાયતમાં કુલ 34 બેઠકોમાંથી ભાજપને ચાર બેઠક બિનહરીફ મળી હતી. જેથી બાકીની 30 બેઠક ઉપર ચૂંટણી યોજાઈ હતી. જેમાં 72.25% મતદાન થયું હતું.
આજે મતગણતરી કરવામાં આવી ત્યારે 30 બેઠકોમાંથી કોંગ્રેસને માત્ર શિનોર અને વલણ બેઠક જ મળી હતી. જેમાં
શિનોર બેઠક ઉપર કોંગ્રેસના પ્રહલાદભાઈ પટેલ તેમજ વલણ બેઠક ઉપર અમીશાબેન વસાવા વિજેતા બન્યા છે. જ્યારે બાકીની તમામ બેઠક ભાજપે કબજે કરી લીધી છે.
વડોદરા જિલ્લા પંચાયતના ઇતિહાસમાં પહેલી વખત કોંગ્રેસના સભ્યોને માત્ર ટુ-વ્હીલર પર જઈ શકાય તેટલી સીટ મળતા કોંગ્રેસના કાર્યકરો નાસીપાસ થયા છે. કોંગ્રેસને પછડાટ મળવા પાછળનું મુખ્ય કારણ સંકલન નો અભાવ તેમજ ટિકિટોની ફાળવણીમાં અન્યાયી વલણ કારણભૂત હોવાનું મનાય છે.
