બીજા દોરની મંત્રણા સરળ નહીં રહે : અમેરિકા અને ઈરાન પોત-પોતાની શર્તો પર મક્કમ : મંત્રણાની સફળતા અંગે શંકા
નવી દિલ્હી: અમેરિકા-ઈરાન વચ્ચે કોઈ નિશ્ચિત સમજૂતી થઈ શકી નથી. સીઝ-ફાયર છતાંએ બંને દેશો એકબીજા ઉપર હુમલા કરી રહ્યા છે. બીજા દોરની શાંતિ-મંત્રણા પૂર્વે ઈરાને પાંચ કઠોર શર્તો મુકી છે. ફાર્સ-ન્યૂઝ એજન્સી પ્રમાણે ઈરાને જણાવી દીધું છે કે જયાં સુધી તેની પાંચ શર્તો સ્વીકારાશે નહીં, ત્યાં સુધી તે મંત્રણામાં ભાગ લેશે નહીં.
ઈરાનની શર્તો આ પ્રમાણે : (૧) પ્રાદેશિક યુધ્ધનો અંત ખાસ કરીને લેબેનોનમાં. (૨) ઈરાન પર લગાડાયેલા પ્રતિબંધો હઠાવવા. (૩) વિદેશોમાં ફ્રીઝ કરેલી ઈરાનની ધન રાશી મુક્ત કરવી. (૪) યુધ્ધમાં ઈરાનને થયેલું નુકસાન ભરપાઇ કરી આપવું. (૫) હોર્મુઝ ઉપર ઈરાનનાં સાર્વભૌમત્વનો સ્વીકાર કરવો.
જો કે ઈરાન પહેલેથી જ આ માંગો કરી રહ્યું છે. જેનો અમેરિકાએ મૂળથી જ અસ્વીકાર કર્યો છે.
ઈરાન કહે છે કે કોઇ પણ મંત્રણામાં સામેલ થતાં પૂર્વે અમારી આ પાંચ શર્તો વૈશ્વિક સ્તરે ખાસ કરીને અમેરિકાએ તે સ્વીકારવી પડે.
આ તરફ અમેરિકાના પ્રમુખ ટ્રમ્પ પોતાની ત્રણ દિવસની ચીનની યાત્રાએ રવાના થયા છે.
ચીન રવાના થતાં પૂર્વે પત્રકારો સાથેની વાતચીતમાં તેમને પૂછવામાં આવ્યું કે, મોંઘવારી અને અર્થવ્યવસ્થા વિષે આપને શું કહેવું છે ત્યારે તેમણે કહ્યું કે, આ તબક્કે તો અર્થતંત્ર વિષે હું ખાસ વિચારતો પણ નથી. જ્યારે ઈરાન યુધ્ધ અંગે તેમણે કહ્યું કે, કોઇ પણ હાલતમાં ઈરાનને પરમાણુ શસ્ત્રો નહીં બનાવવા દેવાય. જેઓ તે વાત સ્વીકારતા નથી. તેઓ મુર્ખ છે.
