મુંબઈ : અમેરિકી રાષ્ટ્રપતિ ડોનાલ્ડ ટ્રમ્પ અને ચીનના પ્રમુખ શી જિનપિંગની બે દિવસની મુલાકાતમાં ઈરાન મામલે ચાઈનાને મદદની ઓફર કર્યાના અહેવાલ છતાં બન્ને દેશો વચ્ચે કોઈ મોટી ડિલ જાહેર નહીં થતાં અને ઈરાન મામલે અનિશ્ચિતતા વચ્ચે આજે વૈશ્વિક બજારોમાં ખાસ એશીયા-પેસેફિક દેશોના બજારોમાં દક્ષિણ કોરિયાના બજારોમાં કડાકા પાછલ સાવચેતીએ નરમાઈ રહી હતી. ભારતીય શેર બજારો માટે આજે રૂપિયો વિલન બન્યો હતો. અમેરિકી ડોલર સામે ભારતીય રૂપિયાનું ઐતિહાસિક ધોવાણ થતું રહી આજે ૯૬ની સપાટી તોડી જતાં અને દેશમાં પેટ્રોલ, ડિઝલના ભાવમાં લીટરે રૂ.૩ અને સીએનજીના ભાવમાં કિલોએ રૂ.૨ વધારો ઝિંકવામાં આવતાં ઔદ્યોગિક વિકાસ પર અસર પડવાની સાથે લોકોની ખર્ચશકિતમાં ઘટાડો થવાની અને મોંઘવારીમાં વધારો થવાના નેગેટીવ પરિબળે શેરોમાં ઉછાળે સાવચેતીમાં વેચવાલી નીકળી હતી. ફોરેન ફંડોની કેશમાં આજે શેરોમાં ખરીદી સામે લોકલ ફંડોની શેરોમાં વેચવાલીએ આરંભિક ઉછાળો ધોવાયો હતો.
સેન્સેક્સ આરંભમાં ૪૭૧.૬૪ પોઈન્ટ વધીને ૭૫૮૭૦.૩૬ સુધી પહોંચ્યો હતો. જે વધ્યામથાળેથી પાછો ફરીને નીચામાં ૭૫૧૩૯.૪૧ સુધી આવી વધ્યામથાળેથી ૬૩૨.૩૭ પોઈન્ટ ઘટીને ૭૫૨૩૭.૯૯ બંધ રહ્યો હતો. જે આગલા બંધની તુલનાએ ૧૬૦.૭૩ પોઈન્ટ ઘટયો હતો. જ્યારે નિફટી ૫૦ સ્પોટ આરંભમાં ૨૩૮૩૯.૩૦ સુધી વધી આવ્યા બાદ નીચામાં ૨૩૬૧૦.૩૦ સુધી આવી અંતે ૪૬.૧૦ પોઈન્ટ ઘટીને ૨૩૬૪૩.૫૦ બંધ રહ્યો હતો.
કેપિટલ ગુડઝ ઈન્ડેક્સ ૭૭૮ તૂટયો
ફંડોની આજે કેપિટલ ગુડઝ-પાવર શેરોમાં ફરી મોટી વેચવાલી થઈ હતી. હિન્દુસ્તાન એરોનોટિક્સ રૂ.૨૨૩.૯૫ તૂટીને રૂ.૪૩૮૬.૫૫, ભેલ રૂ.૧૫.૨૫ ઘટીને રૂ.૩૯૮.૨૦, ડાટા પેટર્નસ રૂ.૧૩૫.૫૫ તૂટીને રૂ.૩૮૭૩.૪૫, કોચીન શિપ રૂ.૫૦.૧૦ ઘટીને રૂ.૧૫૯૫.૧૫, સિમેન્સ રૂ.૧૧૦.૧૦ ઘટીને રૂ.૩૫૮૬.૩૦ રહ્યા હતા. બીએસઈ કેપિટલ ગુડઝ ઈન્ડેક્સ ૭૭૭.૮૯ પોઈન્ટ તૂટીને ૭૬૮૨૬.૪૨ બંધ રહ્યો હતો.
સોના-ચાંદીના ભાવો તૂટતાં મેટલ શેરો તૂટયા
ટાટા સ્ટીલના ત્રિમાસિક પરિણામ સારા આવ્યા છતાં વૈશ્વિક બજારોમાં સોના, ચાંદીના ભાવોમાં કડાકાની અસરે મેટલ-માઈનીંગ શેરોમાં પણ ફંડોએ આજે ફરી નફારૂપી મોટી વેચવાલી કરતાં ધોવાણ થયું હતું. હિન્દુસ્તાન ઝિંક રૂ.૩૧.૬૫ તૂટીને રૂ.૬૩૭.૪૫, ટાટા સ્ટીલનો નફો વધીને આવ્યા છતાં શેર રૂ.૪.૩૫ ઘટીને રૂ.૨૧૬.૮૦, એનએમડીસી રૂ.૧.૮૦ ઘટીને રૂ.૯૧.૪૨ રહ્યા હતા. બીએસઈ મેટલ ઈન્ડેક્સ ૮૭૬.૭૪ પોઈન્ટ તૂટીને ૪૩૩૮૫.૮૫ બંધ રહ્યો હતો.
ઇંધણના ભાવ વધતાં ઓટો શેરો ગબડયા
પેટ્રોલ, ડિઝલના ભાવ વધતાં નેગેટીવ અસરે ઓટોમોબાઈલ શેરોમાં વેચવાલી થઈ હતી. ભારત ફોર્જ રૂ.૩૪.૬૦ ઘટીને રૂ.૧૯૧૩.૭૫, મહિન્દ્રા એન્ડ મહિન્દ્રા રૂ.૪૯.૪૦ ઘટીને રૂ.૩૧૨૨.૬૦, હ્યુન્ડાઈ ઈન્ડિયા રૂ.૧૭ ઘટીને રૂ.૧૮૨૫.૭૫, બજાજ ઓટો રૂ.૭૨.૯૦ ઘટીને રૂ.૧૦,૩૭૮.૧૦ રહ્યા હતા.
રિલાયન્સ પાછળ ઓઈલ-ગેસ શેરોમાં વેચવાલી
રૂપિયો આજે તૂટીને ૯૬.૧૪ના નવા ઐતિહાસિક તળીયે આવી જતાં ઓઈલ કંપનીઓની હાલત કફોડી બનવાની શકયતાએ ફંડોએ ઓઈલ-ગેસ શેરોમાં વેચવાલી કરી હતી. આઈઓસી રૂ.૫.૭૦ તૂટીને રૂ.૧૩૪.૫૫, બીપીસીએલ રૂ.૧૦.૭૦ ઘટીને રૂ.૨૮૪.૪૦, એચપીસીએલ રૂ.૧૦.૯૦ ઘટીને રૂ.૩૬૬.૨૦, રિલાયન્સ ઈન્ડસ્ટ્રીઝ રૂ.૨૫.૪૦ ઘટીને રૂ.૧૩૩૬.૩૫ રહ્યા હતા. બીએસઈ ઓઈલ-ગેસ ઈન્ડેક્સ ૪૮૭.૮૫ પોઈન્ટ ઘટીને ૨૬૮૩૩.૮૫ બંધ રહ્યો હતો.
આઈટી શેરોમાં તેજી
આઈટી-સોફ્ટવેર સર્વિસિઝ શેરોમાં વૈશ્વિક નરમાઈથી વિપરીત આજે ભારતમાં શેરોમાં ખરીદી રહી હતી. ટાટા એલેક્સી રૂ.૧૦૦.૦૫ વધીને રૂ.૪૧૨૩.૬૫, ઈન્ફોસીસ રૂ.૨૨.૮૦ વધીને રૂ.૧૧૧૮.૪૦, ટેક મહિન્દ્રા રૂ.૨૫ વધીને રૂ.૧૩૭૦.૨૫, પર્સિસ્ટન્ટ રૂ.૭૦.૪૦ વધીને રૂ.૪૭૦૨.૮૫, ઓનવર્ડ ટેકનોલોજી રૂ.૪.૭૫ વધીને રૂ.૨૭૧.૨૦ રહ્યા હતા.
ફંડોની બેંકિંગ-ફાઈનાન્સ શેરોમાં વેચવાલી
બેંકિંગ-ફાઈનાન્સ શેરોમાં ફંડોની ફરી વેચવાલી થઈ હતી. ઈન્ડસઈન્ડ બેંક પાસેથી સેબીએ ઈન્ડસાઈડર ટ્રેડિંગ કેસમાં બેંકના અધિકારીઓના ક્લાયન્ટ કંપનીઓમાં સોદાની વિગતો માંગી હોવાના અહેવાલે શેરમાં કડાકો બોલાયો હતો. શેર રૂ.૧૯.૧૫ ઘટીને રૂ.૮૮૭.૩૦, પીએનબી રૂ.૨.૫૦ ઘટીને રૂ.૧૦૨.૦૫, બેંક ઓફ બરોડા રૂ.૬.૨૦ ઘટીને રૂ.૨૬૧.૫૦, કેનેરા બેંક રૂ.૨.૮૫ ઘટીને રૂ.૧૨૮, સ્ટેટ બેંક ઓફ ઈન્ડિયા રૂ.૧૬.૬૦ ઘટીને રૂ.૯૬૨.૯૫ રહ્યા હતા. બીએસઈ બેંકેક્સ ઈન્ડેક્સ ૪૭૧.૯૮ પોઈન્ટ ગબડીને ૬૦૪૮૯.૩૪ બંધ રહ્યો હતો.
DIIની રૂ.૧૯૫૯ કરોડની વેચવાલી
ફોરેન પોર્ટફોલિયો ઈન્વેસ્ટરો-એફપીઆઈઝ, એફઆઈઆઈઝની આજે-શુક્રવારે કેશ સેગ્મેન્ટમાં રૂ.૧૩૨૯.૧૭ કરોડના શેરોની ચોખ્ખી ખરીદી કરી હતી. જ્યારે સ્થાનિક સંસ્થાકીય રોકાણકારો-ડીઆઈઆઈની આજે રૂ.૧૯૫૮.૮૨ કરોડના શેરોની ચોખ્ખી વેચવાલી રહી હતી.
રોકાણકારોની સંપતિ રૂ.૨.૨૬ લાખ કરોડ ઘટી
સેન્સેક્સ, નિફટીમાં આજે ઉછાળા બાદ ધોવાણની સાથે સ્મોલ, મિડ કેપ, એ ગુ્રપના શેરોમાં પણ વેચવાલી નીકળતાં રોકાણકારોની સંપતિ એટલે કે બીએસઈમાં લિસ્ટેડ કંપનીઓનું એક્ત્રિત માર્કેટ કેપિટલાઈઝેશન આજે એક દિવસમાં રૂ.૨.૨૬ લાખ કરોડ ઘટીને રૂ.૪૬૦.૫૯ લાખ કરોડ રહ્યું હતું.
