અમદાવાદના વેપારી સાથે અજાણ્યા શખ્સનું કારસ્તાન : કારખાના માલિકની ખોટી ઓળખ આપી ધોરાજી માલ ઉતારવાના બદલે જૂનાગઢ ખાતે અન્ય ટ્રકોમાં ટ્રાન્સફર કર્યાની ફરિયાદ
જૂનાગઢ, : અમદાવાદથી ધોરાજીના કારખાનામાં ટ્રક મારફત રવાના કરાયેલા રૂા. 43.16 લાખના પ્લાસ્ટીકના દાણા જૂનાગઢ ખાતે અન્ય ટ્રકોમાં ટ્રાન્સફર કરી છેતરપિંડી કરાયા અંગે વેપારીએ પોલીસ ફરિયાદ નોંધાવી છે. કારખાના માલિકની ખોટી ઓળખ આપી માલને અન્ય જગ્યાએ સગેવગે કરી નખાયો હતો.
અમદાવાદમાં એક પેઢીમાં મેનેજર તરીકે કામ કરતા અને પ્લાસ્ટીકના દાણાનો વેપાર કરતા પ્રિતેશભાઈ હર્ષદભાઈ નાયકે જૂનાગઢ તાલુકા પોલીસ ખાતે ફરિયાદમાં જણાવ્યું છે કે, ધોરાજીના કમલ પોલીમર્શ નામના કારખાનામાં રૂા.43,16,440 ની કિંમતના 29,500 કિલોગ્રામ પ્લાસ્ટીકના દાણા મોકલવાના હોવાથી મારૂતી ટ્રાન્સપોર્ટના માલિક સાગરભાઈ પટેલનો સંપર્ક કરી ટ્રકની વ્યવસ્થા કરવા કહેતાં તેણે ડ્રાઈવરના મોબાઈલ નંબર મોકલી આપ્યા હતા. ગોડાઉનથી દાણા ટ્રકમાં ભરી બિલ બનાવી ટ્રક ડ્રાઈવરને આપી દીધેલ. ત્યારબાદ કમલ પોલીમર્શથી ફોન આવેલ કે માલ હજુ મળ્યો નથી તેમજ ડ્રાઈવરને ફોન કરતા ટ્રકની નોઝલ ફાટી ગઈ છે તેવા બહાના કરે છે. ટ્રાન્સપોર્ટરે ડ્રાઈવરને ફોન કરતા સ્વીચઓફ કરી દીધો હતો. કંઈક ગરબડ થયાની આશંકા જણાતા પ્રિતેશભાઈ અને સાગરભાઈ અમદાવાદથી ધોરાજી આવવા નીકળેલા અને બગોદરા ટોલનાકાએ તપાસ કરતા દાણા ભરેલી ગાડી ધોરાજી તરફ આવેલી હોવાની હકીકત મળી હતી. ટ્રકના માલિકનો સંપર્ક કરતા માલ જૂનાગઢ ખાલી કરી દીધેલ હોવાનું કહ્યું હતું. બાદમાં જે મોબાઈલ નંબર મળ્યો તે કારખાના માલિક નહીં પણ ડ્રાઈવરના હોવાનું જાણવા મળ્યું હતું. ટ્રક માલિકે સ્પષ્ટતા કરેલી કે મારી ગાડી અમદાવાદ હતી અને મને કરણી કૃપા ટ્રાન્સપોર્ટમાંથી ફોન આવેલો અને જૂનાગઢનું ભાડું હોવાનું કહેતા હા પાડેલી અને બાદમાં અમદાવાદથી માલ ભરી જૂનાગઢ બાયપાસ રોડ પર અમરદિપ હોટલ પાસે બીજી ગાડીઓમાં માલ ભરી આપેલો હતો અને ભાડું પણ આપી દીધેલું. આમ, ચોક્કસ મોબાઈલ નંબર ધારક શખ્સે ટ્રક ડ્રાઈવરનો સામેથી સંપર્ક કરી પ્રિતેશભાઈના કારખાનાનું લોકેશન આપી કારખાના માલિક હોવાની ખોટી ઓળખ આપી જૂનાગઢ બાયપાસ રોડ પર બીજા ટ્રકોમાં પ્લાસ્ટીકના દાણાની હેરાફેરી કરી છેતરપિંડી કરી હતી. પ્રિતેશભાઈએ એ મોબાઈલ નંબરના ધારક અને તપાસમાં ખુલે તે તમામ શખ્સો સામે ફરિયાદ નોંધાવતાં પીએસઆઈ એસ.કે. ડામોરે તપાસ શરૂ કરી છે.
