Chhota Udepur Taluka Panchayat Pramukh Viral Video: છૂટા ઉદેપુર જિલ્લામાં લોકપ્રતિનિધિઓ દ્વારા જાહેરમાં હથિયારોના પ્રદર્શનનો મામલો ગરમાયો છે. ગઈકાલે (24મી મે) સાંસદ જશુ રાઠવાનો બંદૂક વાળો વીડિયો વાઈરલ થયા બાદ, હવે છોટા ઉદેપુર તાલુકા પંચાયતના નવનિયુક્ત પ્રમુખ રમેશ રાઠવા પદ સંભાળતાની સાથે જ મોટા વિવાદમાં સપડાયા છે. સોશિયલ મીડિયા પર તેનો વીડિયો વાઈરલ થઈ રહ્યો છે, જેમાં તે ખુલ્લેઆમ બંને હાથમાં હથિયારો લહેરાવતા જોવા મળી રહ્યા છે.
જીતની ખુશીમાં કાયદાનો ડર ભૂલ્યા પ્રમુખ
મળતી માહિતી અનુસાર, છોટા ઉદેપુર તાલુકા પંચાયતના પ્રમુખ તરીકે વરણી થયા બાદ રમેશ રાઠવાના સમર્થકો અને પક્ષના કાર્યકરો દ્વારા એક ભવ્ય વિજય રેલીનું આયોજન કરવામાં આવ્યું હતું. આ દરમિયાન પ્રમુખ રમેશ રાઠવા જીતની ખુશીમાં એટલા ભાન ભૂલ્યા હતા કે તેણે કાયદાનો કોઈ પણ ડર રાખ્યા વિના પોતાના બંને હાથમાં બે મોટી બંદૂકો પકડી રાખી હતી અને તેનું પ્રદર્શન કર્યું હતું. વિજય સરઘસમાં હાજર કોઈ વ્યક્તિએ આ સમગ્ર નજારો પોતાના મોબાઈલ કેમેરામાં કેદ કરી લીધો હતો, જે વીડિયો હવે સોશિયલ મીડિયા પર ભારે ચર્ચાનો વિષય બન્યો છે.
આ પણ વાંચો: છોટા ઉદેપુરની તાલુકા પંચાયતની ચૂંટણીમાં નવો વિવાદ, જીત બાદ વિજય સરઘસમાં બંદૂક સાથે દેખાયા ભાજપ નેતા
જનતા અને વિપક્ષમાં ભારે આક્રોશ
એક જવાબદાર લોકપ્રતિનિધિ તરીકે બંધારણીય પદ પર બેઠા પછી સાર્વજનિક સ્થળોએ હથિયારોનું આ પ્રકારે પ્રદર્શન કરવું કેટલું યોગ્ય છે, તેને લઈને સ્થાનિક જનતા અને વિપક્ષ દ્વારા તીખી પ્રતિક્રિયાઓ આપવામાં આવી રહી છે. સોશિયલ મીડિયા પર નેટિઝન્સ સવાલો ઉઠાવી રહ્યા છે કે શું કાયદા અને નિયમો માત્ર સામાન્ય નાગરિકોને ડરાવવા માટે જ છે? સત્તાના નશામાં ચૂર થઈને કાયદો હાથમાં લેતા આવા નેતાઓ સામે પોલીસ ક્યારે લાલ આંખ કરશે?
જિલ્લામાં બે દિવસમાં બે મોટા નેતાઓના હથિયાર લહેરાવતા વીડિયો સામે આવ્યા બાદ કાયદો અને વ્યવસ્થાની સ્થિતિ સામે પણ સવાલો ઊભા થઈ રહ્યો છે.
