પ્રધાનમંત્રી નરેન્દ્ર મોદીએ અમદાવાદમાં પ્રથમ વિશ્વ યોગાસન ચેમ્પિયનશિપનું ઉદ્ઘાટન કર્યું, જે યોગાસન રમતની વૈશ્વિક યાત્રામાં એક ઐતિહાસિક સીમાચિહ્ન સમાન છે.
કેન્દ્રીય યુવા બાબતો અને રમતગમત તેમજ શ્રમ અને રોજગાર મંત્રી ડૉ. મનસુખj માંડવિયાએ અને ગુજરાતના મુખ્યમંત્રી શ્રી ભૂપેન્દ્ર પટેલે યોગાસનને મુખ્ય આંતરરાષ્ટ્રીય રમતગમત સ્પર્ધાઓમાં સ્થાન અપાવવા માટેના પ્રયાસોને સમર્થન આપ્યું.
વિશ્વ યોગાસનના માનનીય અધ્યક્ષ યોગઋષિ સ્વામી રામદેવજી મહારાજ, વિશ્વ યોગાસન અને યોગાસન ભારતના મહાસચિવ ડૉ. જયદીપ આર્ય તથા યોગાસન ભારતના અધ્યક્ષ ઉદિત શેઠે 78 દેશોના ખેલાડીઓ સાથે આ ઐતિહાસિક ચેમ્પિયનશિપમાં ભાગ લીધો.
અમદાવાદ, 4 જૂન, 2026:
અમદાવાદે ગુરુવારે રમતગમતના ઇતિહાસમાં પોતાનું નામ સુવર્ણ અક્ષરે નોંધાવ્યું, કારણ કે ઈકેએ એરિના ટ્રાન્સસ્ટેડિયા ખાતે પ્રથમ વિશ્વ યોગાસન ચેમ્પિયનશિપ 2026નો પ્રારંભ થયો. યોગાસન રમતને સમર્પિત આ પ્રથમ વૈશ્વિક ચેમ્પિયનશિપમાં 78 દેશોના 500થી વધુ ખેલાડીઓ એકત્ર થયા છે.
ચેમ્પિયનશિપને ખુલ્લી જાહેર કરતાં પ્રધાનમંત્રી શ્રી નરેન્દ્ર મોદીએ આ કાર્યક્રમને યોગાસન માટેના નવા યુગની શરૂઆત ગણાવી. તેમણે કહ્યું:
“આજે અમદાવાદની ધરતી પરથી વિશ્વની રમતગમતની વારસામાં એક નવું અધ્યાય જોડાયું છે. આજે પ્રથમ વિશ્વ યોગાસન સ્પોર્ટ્સ ચેમ્પિયનશિપનો પ્રારંભ થયો છે.”
યોગાસનના ભવિષ્ય પ્રત્યે વિશ્વાસ વ્યક્ત કરતાં શ્રી મોદીએ કહ્યું:
“મને વિશ્વાસ છે કે ભવિષ્યમાં યોગાસન પણ આંતરરાષ્ટ્રીય રમતગમતમાં પોતાનું સ્થાન બનાવશે. અમદાવાદમાં યોજાતી આ વિશ્વ યોગાસન ચેમ્પિયનશિપ યોગાસનને ઓલિમ્પિક્સ અને કોમનવેલ્થ ગેમ્સ જેવી મોટી રમતગમત સ્પર્ધાઓમાં સામેલ કરવા માટે એક મહત્વપૂર્ણ પગથિયું સાબિત થશે.”
આ ચેમ્પિયનશિપ યોગાસનના વિકાસમાં એક નિર્ણાયક ક્ષણ છે, જે પ્રાચીન ભારતીય પરંપરાને વૈશ્વિક સ્પર્ધાત્મક રમત તરીકે સ્થાપિત કરે છે અને તેને આંતરરાષ્ટ્રીય રમતગમતની માન્યતા તરફ આગળ ધપાવે છે.
આ પ્રસંગને ઐતિહાસિક ગણાવતા કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ કહ્યું:
“જ્યારે પ્રથમ ફૂટબોલ વર્લ્ડ કપ યોજાયો હતો ત્યારે માત્ર 13 દેશોએ ભાગ લીધો હતો. આજે પ્રથમ વિશ્વ યોગાસન ચેમ્પિયનશિપમાં વિશ્વના 78 દેશો હાજર છે.”
યોગાસનના મૂલ્યો પર ભાર મૂકતાં તેમણે વધુમાં કહ્યું:
“જ્યારે દુનિયા શક્તિની વાત કરતી હતી, ત્યારે ભારત સંતુલનની વાત કરતું હતું.” તેમણે ઉમેર્યું:”યોગાસન દ્વારા અમે આ વિચારને રમતના સ્વરૂપમાં સમગ્ર વિશ્વમાં ફેલાવી રહ્યા છીએ.”
ભવિષ્ય અંગે વાત કરતાં તેમણે પુનઃદૃઢતા વ્યક્ત કરી કે યોગાસનને અમદાવાદમાં યોજાનારી 2030 કોમનવેલ્થ ગેમ્સમાં સામેલ કરવામાં આવશે અને ભવિષ્યમાં ઓલિમ્પિક્સમાં સ્થાન મેળવવા માટેના પ્રયાસો પણ ચાલુ છે.
ગુજરાતના મુખ્યમંત્રી શ્રી ભૂપેન્દ્ર પટેલે વિશ્વભરના ખેલાડીઓ, પ્રતિનિધિઓ અને મહાનુભાવોને આવકારતા કહ્યું:
“પ્રથમ વિશ્વ યોગાસન ચેમ્પિયનશિપ 2026નું આયોજન અમદાવાદમાં થવું એ ગૌરવની વાત છે. હું વિશ્વભરમાંથી આવેલા ખેલાડીઓ, મહાનુભાવો, મહેમાનો અને મીડિયા પ્રતિનિધિઓનું સ્વાગત કરું છું. આપ સૌની ઉપસ્થિતિ આ ઐતિહાસિક પ્રસંગને વધુ મહત્ત્વપૂર્ણ બનાવે છે. આ ચેમ્પિયનશિપ વિશ્વ માટે એક અદ્ભુત દૃશ્ય બનશે અને હું તેની ભવ્ય સફળતા માટે શુભેચ્છાઓ પાઠવું છું.”
વિશ્વ યોગાસનના માનનીય અધ્યક્ષ યોગઋષિ સ્વામી રામદેવજી મહારાજે કહ્યું:”આજે એક મહત્વપૂર્ણ પ્રસંગ છે, જ્યાં વિશ્વભરના પ્રતિભાગીઓ પ્રથમ વિશ્વ યોગાસન ચેમ્પિયનશિપ માટે એકત્ર થયા છે. લાખો યુવાનો યોગાસનને રમત અને વ્યક્તિગત વિકાસના માર્ગ તરીકે અપનાવી રહ્યા છે. આ ચેમ્પિયનશિપ માત્ર સ્પર્ધા નથી, પરંતુ આત્મશોધ, આત્મઅનુશાસન અને આત્મવિકાસની યાત્રા છે. આજે યોગાસનના ઇતિહાસમાં એક નવું અધ્યાય લખાયું છે.”
વિશ્વ યોગાસન અને યોગાસન ભારતના મહાસચિવ ડૉ. જયદીપ આર્યએ કહ્યું:”અપણે માત્ર પોતાની મુદ્રા પર જ નહીં, પરંતુ પોતાના પર પણ પ્રભુત્વ મેળવવું પડશે. એ જ યોગ છે. યોગ બહારની દુનિયામાંથી અંદરની દુનિયા તરફની યાત્રા છે. યોગાસન રમત દ્વારા અમે એવું મંચ ઊભું કરી રહ્યા છીએ, જ્યાં ખેલાડીઓ માત્ર શારીરિક શ્રેષ્ઠતા જ નહીં, પરંતુ સંતુલન, અનુશાસન અને માનસિક શક્તિ પણ પ્રદર્શિત કરી શકે. આપણે માત્ર પોતાની મુદ્રા સુધારવી નથી, પરંતુ દરેક પરિસ્થિતિમાં સંતુલિત અને અનુકૂળ રહેવા માટે મનને પણ તાલીમ આપવી છે.”
યોગાસન ભારતના અધ્યક્ષ ઉદિત શેઠે જણાવ્યું:
“વિશ્વ હવે યોગાસન રમત માટે તૈયાર છે. આ ચેમ્પિયનશિપ માત્ર સ્પર્ધા નથી. તે અનુશાસન, શ્રેષ્ઠતા, સંતુલન, એકાગ્રતા અને માનવ આત્માની અસીમ ક્ષમતાનું પ્રદર્શન છે. યોગાસન રમત દ્વારા અમે વિશ્વના યુવાનોને રમત, પ્રેરણા અને શ્રેષ્ઠતા દ્વારા યોગમય જીવનશૈલી અપનાવવાનો નવો માર્ગ આપી રહ્યા છીએ. આજે અમદાવાદમાં 78 દેશોના ખેલાડીઓની ઉપસ્થિતિ સાથે અમે યોગાસનની વૈશ્વિક યાત્રાની ઐતિહાસિક ક્ષણના સાક્ષી બની રહ્યા છીએ.”
યજમાન ભારતે 122 સભ્યોની ટીમ ઉતારી છે. આગામી પાંચ દિવસ દરમિયાન ખેલાડીઓ વ્યક્તિગત, કલાત્મક અને પરંપરાગત જૂથ સ્પર્ધાઓ સહિત છ વયજૂથોમાં સ્પર્ધા કરશે.
આ ચેમ્પિયનશિપમાં પ્રથમ વખત વૈશ્વિક સ્તરે ઇલેક્ટ્રોનિક સ્કોરિંગ સિસ્ટમનો ઉપયોગ કરવામાં આવશે, જે પારદર્શિતા, સુસંગતતા અને નિર્ણાયક પ્રક્રિયાના ધોરણોને વધુ મજબૂત બનાવશે. સ્પર્ધામાં 32 આંતરરાષ્ટ્રીય અને 51 રાષ્ટ્રીય નિર્ણાયકો ફરજ બજાવશે.
78 દેશોના ખેલાડીઓ અમદાવાદમાં એકત્ર થતાં, પ્રથમ વિશ્વ યોગાસન ચેમ્પિયનશિપે માત્ર શહેર અને દેશ માટે જ ઇતિહાસ સર્જ્યો નથી, પરંતુ યોગાસનને ખરેખર વૈશ્વિક સ્પર્ધાત્મક રમત તરીકે સ્થાપિત કરવાની દિશામાં પણ મહત્વપૂર્ણ સંકેત આપ્યો છે.
